اتامباەۆ پارلامەنتتى تاراتۋ تۋرالى باستامانى قولدادى

قىرعىزستان پرەزيدەنتى المازبەك اتامباەۆ پارلامەنتتى تاراتۋ تۋرالى باستامانى قولدادى, دەپ حابارلايدى قازاقپارات KABAR اگەنتتىگىنە سىلتەمە جاساپ. قىرعىزستان پرەزيدەنتىنىڭ ايتۋىنشا, وتكەن اپتادا پارلامەنت وتىرىسىندا «ونۋگۋ-پروگرەسس» فراكتسياسىنىڭ كوشباسشىسى باقىت توروباەۆ ارىپتەستەرىنە پارلامەنتتى تاراتۋ تۋرالى ۇسىنىس جاساعان. قىرعىزستان باسشىسى اتاپ وتكەندەي, سوڭعى كۇندەرى پارلامەنتتە داچي-سۋ  اۋىلىنىڭ ماڭىندا اپاتقا ۇشىراعان «بوينگ-747» ۇشاعىنداعى جۇكتىڭ اتامباەۆقا تيەسىلى ەكەندىگى جانە ونىڭ كيپردە وففشورلىق م ۇلىگى بار دەگەن ايىپ تاعىلۋدا. «ايتۋلارىنشا, بورتتاعى جۇك مەنىكى ەكەن. ولار وسى سوزدەرىن ايقايلاپ ايتۋدا, الايدا وزدەرى ونىڭ جالعان ەكەندىگى جاقسى بىلەدى. ەگەر ولار سەنىمدى بولسا, نەگە ىستانبۇلعا نەمەسە گونكونگكە بارىپ, وسى اقپاراتتى تەكسەرمەيدى جانە ايعاقتار الىپ كەلمەس پە ەدى. الدە قيىن با؟», - دەدى ا.اتامباەۆ. سونىمەن قاتار, پرەزيدەنت كيپردە «ونىڭ ميلليونداعان قارجىسى جاتقان ەسەپشوتى بار» دەگەن قاۋەسەتتىڭ دە وسىعان كەلىپ ساياتىنىن اتاپ ءوتتى. «قىمباتتى دەپۋتاتتار, قارعا قارعانىڭ كوزىن شۇقىمايدى دەگەن ءسوزدى جاقسى بىلەسىزدەر. مۇمكىن, شىنىمەن توروباەۆتى قولداپ, تارايسىزدار؟ نەمەسە زاڭدى قۇرمەتتەپ, ەلىمىزدىڭ بولاشاعىن ويلاعىلارىڭىز كەلسە, حالىق ءۇشىن جۇمىس جاساڭىزدار. قۇدايدان قورقىڭىزدار! ەگەر سىزدەرگە شىندىق قاجەت بولماسا, ول شىندىق حالىققا كەرەك. ەگەر سىزدەرگە تۇراقتىلىق كەرەك بولماسا, ول حالىققا قاجەت!», - دەدى اتامباەۆ.