جامبىلدىق ۇستازدار ءبىلىم بەرۋ سالاسىنداعى وزەكتى ماسەلەلەردى تالقىلادى

جامبىل وبلىسىنداعى ءبىلىم بەرۋ مەكەمەلەرىنىڭ قىزمەتكەرلەرى ۇستازداردىڭ كاسىبي بىلىكتىلىگىن كوتەرۋ مەن ۇزدىك يننوۆاتسيالىق تاجىريبەلەرىن دامىتۋ جايىن تالقىلادى. بۇل تۋرالى تارمپي-دىڭ رەسمي وكىلى جاندار اسان حابارلادى. تاراز مەملەكەتتىك پەداگوگيكالىق ينستيتۋتىنىڭ ۇيىتقى بولۋىمەن ۇيىمداستىرىلعان «قازاقستاننىڭ ءۇشىنشى جاڭعىرۋى: ءبىلىم بەرۋدەگى يننوۆاتسيالار جانە تاجىريبە» اتتى پەداگوگيكالىق وقۋلار اياسىندا وتكەن القالى جيىندا ءبىلىم مەن عىلىمدى ينتەگراتسيالاۋداعى جاڭاشىلدىقتار, دۋالدى ءبىلىم بەرۋ جۇيەسىندە باسەكەگە قابىلەتتى پەداگوگ كادرلاردى دايىنداۋدىڭ ماڭىزى,  جاڭارتىلعان ءبىلىم بەرۋ مازمۇنىندا پەداگوگتىڭ كاسىبي شەبەرلىگىن ارتتىرۋ مەن وزەكتى ماسەلەلەردى شەشۋ جولدارى جانە نازارباەۆ زياتكەرلىك مەكتەپتەرىنىڭ  يننوۆاتسيالىق ءىس-تاجىريبەسىن زەردەلەۋ سىندى ماسەلەلەر ءسوز بولدى. «باسقوسۋدا ءبىلىم بەرۋ مازمۇنىن جاڭارتۋ, پەداگوگيكالىق ماماندىقتارداعى مەنەدجمەنت, پەداگوگيكالىق كادرلاردى دايارلاۋدا جانە بىلىكتىلىگىن ارتتىرۋدا جاڭا امالداردى جۇزەگە اسىرۋ سىندى ءبىلىم بەرۋ جۇيەسىنىڭ نەگىزگى ترەندتەرىن ايقىندايتىن ماسەلەلەر قاراستىرىلدى. بۇلاردىڭ بارلىعى نارىقتىق ەكونوميكا جاعدايلارىندا ءومىر ءسۇرۋ تالاپتارىنا سايكەس ءوز ءبىلىمى مەن مادەنيەتىن ۇزدىكسىز ارتتىرۋعا, الەمدىك اقپاراتتىق كەڭىستىكتە بىرىگۋگە قابىلەتتى ەركىن جانە سىن تۇرعىسىنان ويلاي الاتىن تۇلعانى تاربيەلەۋ, وقىتۋ جانە دامىتۋ جاعدايلارىن قامتاماسىز ەتۋدى شەشۋگە باعىتتالۋى ءتيىس», – دەيدى شارا ۇيىمداستىرۋشىلارى.