قر يدم كوميتەتىنىڭ باسشىسى ۇيىمداسقان قىلمىستىق توپ قۇرعان - ۇلتتىق بيۋرو

قازاقستان رەسپۋبليكاسىنىڭ ينۆەستيتسيا جانە دامۋ مينيسترلىگىنىڭ گەولوگيا جانە جەر قويناۋىن پايدالانۋ كوميتەتىنىڭ توراعاسى بازارباي نۇراباەۆ باسشىلىق ەتكەن قىلمىستىق توپتىڭ قىزمەتى اشكەرەلەندى, دەپ حابارلادى سىبايلاس جەمقورلىققا قارسى ءىس-قيمىل ۇلتتىق بيۋروسى. ۆەدومستۆونىڭ حابارلاۋىنشا, نۇراباەۆ قازاقستان رەسپۋبليكاسىنىڭ تەرريتورياسى بويىنشا جەر قويناۋىن پايدالانۋعا كەلىسىمشارت جاساۋ ءۇشىن كاسىپكەرلەردەن اسا ءىرى كولەمدە پارا الۋ ءۇشىن قىلمىستىق جوسپار قۇرعان. "بۇل قىلمىستىق جوسپارعا كوميتەت توراعاسىنىڭ سەنىمدى وكىلى - ورىنباسارى ن.قۇربانوۆ, "قازجەرقويناۋى" جانە "يۋجكازنەدرا" رمك باسشىلارى ا.نۇرجاۋباي مەن ە.ءادىلحانوۆ, "كازگەوينفورم" مب باسشىسى ا.وتەگەنوۆ, ماڭعىستاۋ وبلىستىق گەولوگيا ينسپەكتسياسىنىڭ باسشىسى ب.مۋتان, سونداي-اق, كوميتەتتىڭ قۇرىلىم بولىمشەلەرىنىڭ باسشىلارى تارتىلعان", - دەلىنگەن حابارلامادا.  سونىمەن قاتار, ب.نۇراباەۆتىڭ سەنىمدى وكىلى م.ابدراشەۆ (سىنىپتاسى) سىبايلاسى بولعان دەلىنەدى. 6 ناۋرىزدا ب.نۇراباەۆ "اكمولا گولد" جشس وكىلىنەن مەملەكەتتىك جەر قويناۋىن زەرتتەۋگە كەلىسىمشارت جاساسۋعا كومەكتەسكەنى ءۇشىن كەزەكتى رەت 20 مىڭ اقش دوللارى كولەمىندە پارا الىپ جاتقان جەرىنەن ۇستالعان. سونىمەن قاتار, ب.نۇراباەۆ پەن م.ابدراشەۆ پارا رەتىندە 25 مىڭ دوللار بولاتىن AUDI Q7 كولىگى مەن شىمكەنتتە قۇنى 25 مىڭ دوللار بولاتىن 3 بولمەلى ءۇي العان. بۇل م ۇلىكتەر ابدراشەۆتىڭ ۇلىنىڭ اتىنا جازىلعان. سونىمەن قاتار, ونىڭ "SKPetroleum" جشس وكىلىنەن 20 مىڭ دوللار العانى انىقتالعان. مۇنىمەن بىرگە, ول شىعىس قازاقستان, جامبىل جانە قاراعاندى وبلىستارىنداعى جەر قويناۋىن پايدالانۋشىلاردان كەلىسىمشارت جاساسۋدا لوببيلەگەنى ءۇشىن تاۋار-ماتەريالدىق قۇندى زاتتار العانى انىقتالىپ وتىر. كوميتەت باسشىسى الدى دەلىنگەن جالپى پارا كولەمى - 100 مىڭ اقش دوللارى. سوتالدى تەرگەۋ جالعاسىپ جاتىر.