تاراز مەملەكەتتىك پەداگوگيكالىق ينستيتۋتىنىڭ «جانساراي» جاستار تەاترى بەلگىلى اقىن, دراماتۋرگ يسرايل ساپاربايدىڭ «اۋىلدان كەلگەن ارۋ» پەساسىن ساحنالادى, دەپ حابارلايدى وقۋ ورنىنىڭ رەسمي وكىلى جاندار اسان.
قويىلىمدا اۋىلدان قالاعا كەلگەن بويجەتكەننىڭ ومىردەن كورگەن قيىندىعى باياندالادى. مەكتەپتى كەشە عانا بىتىرگەن ورىمدەي قىز قيىن دا سوقپاقتى جولداردىڭ ازابىن تارتادى. جوعارى وقۋ ورنىنا تۇسە الماي قالعان بويجەتكەننىڭ تاعدىرى قالانىڭ داڭعازا ومىرىنە ۇلاسىپ, الدانىپ, اركىمگە اربالىپ, اقىرى سوڭى جۇكتى بولىپ, ومىرگە نارەستە اكەلىپ, ونى تاستاپ كەتۋمەن اياقتالادى. كۇندەلىكتى كۇيبەڭ تىرشىلىكتە كەزىگەتىن وقيعا. اسىرەسە, قالانىڭ قىم-قۋىت ومىرىنە قىزىققان اۋىل بالاسىنا ءتان قۇبىلىس. وقيعا جەلىسى ەكى جاستىڭ اراسىندا ءوربىپ, سان ءتۇرلى مىنەز-ق ۇلىق يەلەرىنىڭ وبرازىن اشادى.
– ستۋدەنتتىك ونەر ۇجىمىنىڭ ەلىمىزدەگى تەاتر ساحنالارىندا العاش رەت وسىدان 26 جىل بۇرىن قويىلعان پەسانى تاڭداپ الۋى بەكەر ەمەس. ءبىز تاربيەلىك ماڭىزى ءالى دە زور قويىلىم ارقىلى جاستاردى جامان ارەكەتتەردەن ساقتاندىرعىمىز كەلدى. ولارعا وي سالىپ, وڭ جولمەن ءجۇرۋدى ناسيحاتتاماق نيەتتە بولدىق, – دەيدى تەاتردىڭ كوركەمدىك جەتەكشىسى, قازاقستان رەسپۋبليكاسىنىڭ ەڭبەك سىڭىرگەن ءارتىسى مايرا الىمبەتوۆا.
ونىڭ ايتۋىنشا, بولاشاقتا جاستار تەاترى ماحاببات پەن دوستىقتىڭ قانشالىقتى قۇدىرەتتى كۇش, ۇلى سەزىم ەكەنىن ۇعىندىراتىن ياكي كوپشىلىكتىڭ كوڭىل تورىنەن ورىن العان كلاسسيكالىق قويىلىمداردى ساحنالاۋدى جوسپارلاپ وتىر.
ماماندىقتارى كاسىبي اكتەرلىكتەن الىس بولسا دا ادىلەت ابدىقادىر, تاڭشولپان ماراتقىزى, جادىرا تۇرماحانقىزى سىندى جاس ونەرپازدار باستى رولدەردى شەبەر سومداپ شىقتى. كورەرمەندى سەندىردى. كوزگە ىستىق جاس كەلتىردى.
– بۇعان دەيىن وقۋ ورنىندا وتەتىن مەرەكەلىك ءىس-شارالارداعى شاعىن قويىلىمداردا وينادىق. ساحنانىڭ كيەسى مەن ۇلى ونەردىڭ قۇدىرەتىنە دەگەن شەكسىز ماحابباتىمىز «جانسارايعا» الىپ كەلدى. دانا حالقىمىزدا «ەل ىشىندە ونەر بار, ونەردى تاپقان شەبەر بار» دەگەن ناقىل ءسوز بار. ءبىز ءۇشىن قوعامدىق وي-سانانىڭ شارىقتاۋ شەگى مەن ادامي دۇنيەتانىمنىڭ جەمىسى بولىپ تابىلاتىن تەاتر ونەرىنىڭ ورىنى ءبىر توبە. بولمىس-ءبىتىمى ارقيلى كەيىپكەرلەردىڭ ءرولىن ويناۋ ارقىلى
ماڭگىلىك سەزىمگە تولى بەكزات ونەردىڭ قىر-سىرىن مەڭگەرە تۇسەمىز, – دەيدى قويىلىمدا ساندىگۇلدىڭ ءرولىن سومداعان تاڭشولپان ماراتقىزى.
اشىلعانىنا 8 جىلدىڭ ءجۇزى بولعان «جانسارايدىڭ» العا قويعان ماقساتى بيىك. جاس ونەرپازدار جامبىل وبلىستىق قازاق دراما تەاترىمەن تىعىز بايلانىس ورناتىپ, كاسىبي اكتەرلەرمەن شىعارماشىلىق بىرلەستىكتە جۇمىس اتقارۋدا. ونەر ۇجىمى وسى ۋاقىتقا دەيىن الىمبەك ورازبەكوۆتىڭ «ءبىر ءتۇپ الما اعاشى», بولات ۇزاقوۆتىڭ «جانۇيا» جانە يسرايل ساپاربايدىڭ «سىعان سەرەناداسى» سپەكتاكلدەرىن ساحنالاعان بولاتىن. بۇگىنگى تاڭدا تەاتر ستۋدەنتتەرى تاريحي قويىلىمدارعا دايىندالۋدا.
