گولوۆكين دجەيكوبستان جەڭىلسە, بارلىق اتاقتان ايىرىلادى – پروموۋتەر

پروموۋتەر توم لەففلەر ورتا سالماقتا WBA (Super), IBO, WBC جانە IBF تۇجىرىمدارى بويىنشا الەم چەمپيونى گەننادي گولوۆيكيننىڭ (36-0, 33 كو) الداعى جەكپە-جەگى جونىندە پىكىر ءبىلدىردى. «وتكەن جىلى WBC جەلىسى بويىنشا الۆارەسپەن, WBA جولىندا دجەيكوبسپەن مىندەتتى جەكپە-جەك وتكىزۋ كەرەك بولعاندىقتان, باسقا ەشنارسەگە كوڭىل بولە المادىق. سونىڭ سالدارىنان نەبارى ەكى-اق كەزدەسۋ وتكىزدىك. ال گولوۆكين جىل سايىن ءۇش-ءتورت مارتە رينگكە شىعىپ ۇيرەنىپ قالعان», – دەدى قازاقستاندىق بوكسشىنىڭ پروموۋتەرى توم لەففلەر. «مەنىڭ باستى جۇمىسىم – ءبارىن الدىن الا جوسپارلاپ وتىرۋ. ال GGG بيىل كەمىندە ءۇش رەت ايقاس وتكىزۋدى جوسپارلاپ وتىر. بىراق بۇل دجەيكوبستى نازاردان تىس قالدىردىق دەگەن ءسوز ەمەس. گەنناديدىڭ قازىرگى ۋاقىتتاعى بار ويى دەنني جايلى. سەبەبى, 18 ناۋرىزدا جەڭىسكە جەتپەسە, ءبارى قۇردىمعا كەتپەك. بۇگىنگى كۇنىمىزگە جەتۋ ءۇشىن كوپ ەڭبەكتەندىك. ونىڭ ۇستىنە ايقاسقا شاقىرعان بوكسشىلاردىڭ كوبى ۋادەلەرىنەن اينىپ قالىپ جاتاتىن ساتتەر بولىپ تۇردى. سوندىقتان كىشكەنە عانا سالعىرتتىعىمىز جوسپارىمىزدىڭ كۇل-تالقانىن شىعارادى. ماسەلەن, باسكەتبولدا جەڭىلىپ تۇرىپ تا چەمپيون بولۋعا مۇمكىندىك بار. ال بوكستا ءبارى كەرىسىنشە. ءبىر عانا جەڭىلىس قولىڭدا تۇرعان اتاقتىڭ بارىنەن ايىرادى. مۇنداي كەزدە دجەيكوبس ورتا سالماقتا ەڭ مىقتى بوكسشى اتانىپ كەتەدى», – دەدى لەففلەر. ايتا كەتەيىك, قوس بوكسشىنىڭ اراسىنداعى ايقاس 18 ناۋرىز كۇنى نيۋ-يورك قالاسىنداعى Madison Square Garden ارەناسىندا وتەدى.