شاڭعىشى اننا شەۆچەنكوعا پاتەر كىلتى تابىس ەتىلدى

قىسقى ۋنيۆەرسيادا ويىندارىندا بەس مەدال جەڭىپ العان شاڭعىشى اننا شەۆچەنكوعا پاۆلودار قالاسىندا ءوڭىر اكىمى ەكى بولمەلى پاتەردى سىيعا تارتتى. بۇل تۋرالى pavlodarnews.kz حابارلادى. وبلىس باسشىسى بولات باقاۋوۆ سپورتشىعا حالىقارالىق جارىستا بارىن سالىپ, قازاقستان نامىسىن ابىرويمەن قورعاعانى ءۇشىن العىس ايتتى. «ءسىزدىڭ ءاربىر جارىسىڭىزدى جىبەرمەي, قاراپ وتىردىق. ەل قۇراماسىنىڭ قورجىنىنا بەس بىردەي مەدال سالىپ, بارشا قازاقستاندىقتاردى قۋانىشقا بولەدىڭىز. جاتتىعۋ جۇمىستارىنىڭ تىعىزدىعىنا قاراماي, ۋاقىت ءبولىپ كەلگەنىڭىز ءۇشىن العىس بىلدىرەمىن», – دەدى بولات باقاۋوۆ. «سىزدەردىڭ قولداۋلارىڭىزدان كۇش الىپ, وسىنداي جەتىستىكتەرگە جەتىپ وتىرمىن. بۇگىن مىنە, تاعى ءبىر ارمانىم ورىندالدى. العاشقى مەدالىمدى جەڭىپ العان كەزدە وبلىس اكىمى حابارلاسقانىن ەستىگەندە ارىپتەستەرىم ازىلدەپ تۇر دەپ ويلاپ قالدىم. سىزدەرگە كوپ راحمەت!» – دەدى اننا شەۆچەنكو. ايتا كەتەيىك, پاۆلودار وبلىسىنان XXVII قىسقى ۋنيۆەرسيادادا 10 سپورتشى قاتىسقان. اننا شەۆچەنكو ءبىر التىن, ءبىر كۇمىس, ءۇش قولا جۇلدە جەڭىپ العان بولاتىن.