فيرۋزا ءشارىپوۆا جاراقاتپەن شارشى الاڭعا شىقتى – مەنەدجەرى

قازاقستاندىق كاسىپقوي بوكسشى قىز فيرۋزا ءشارىپوۆانىڭ رەسەيلىك يۋليا چەرنوبورودوۆاعا قارسى ايقاسى جايلى مەنەدجەرى سەرگەي زاۆيلەيسكي پىكىر ءبىلدىردى. بۇل تۋرالى sports.kz حابارلادى. «جەكپە-جەك فيرۋزا ءۇشىن وڭاي وتكەن جوق. يۋليا كاسىپقوي رينگكە العاش رەت شىعىپ تۇرسا دا, وڭاي قارسىلاس ەمەستىگىن تاعى ءبىر مارتە دالەلدەي ءتۇستى. الداعى ۋاقىتتا ءبارى جۇيەلى تۇردە جۇزەگە اسسا, بولاشاعىنان ۇلكەن ءۇمىت كۇتۋگە بولادى. پروموۋتەرى ەلەنا ماركوۆا ءوز ءىسىنىڭ شەبەرى. يۋليا ءۇشىن قاجەتتى جاعدايدىڭ ءبارىن جاسايدى دەپ ويلايمىن», – دەدى زاۆيلەيسكي. «فيرۋزا كۇمانسىز جەڭىسكە جەتتى. تەك العاشقى راۋند قانا تەڭ دارەجەدە اياقتالدى دەپ ايتا الامىن. سەبەبى, جاتتىقتىرۋشى سەرگەي كۋيبىشەۆ قارسىلاسىنىڭ ىڭعايىن ءبىلىپ الماق ءۇشىن ارتتىق قيمىلداماۋ جونىندە تاپسىرما بەرگەن. ونىڭ ۇستىنە ءشارىپوۆا سوڭعى سپاررينگ كەزدەسۋىندە قارسىلاستارىنىڭ بىرىمەن سوقتىعىسىپ قالىپ, مۇرنىن جاراقاتتاپ العان. وسىدان كەيىن جەكپە-جەكتى كەيىنگە قالدىرماق بولعانبىز. دارىگەرلەر جۇدىرىقتاسا الاتىنىن, بىراق سوققى جىبەرىپ السا, قاتتى اۋىرسىناتىنىن ايتقان. فيرۋزا العان بەتىنەن قايتپاي, شارشى الاڭعا شىقتى», – دەدى مەنەدجەرى. «ءشارىپوۆا ءۇشىن بۇل ۇلكەن تاجىريبە بولدى. كەزەكتى رەت ءوزىنىڭ مىقتىلىعىن دالەلدەي ءتۇستى. باستىسى, ءبىر ورىندا تۇرىپ قالماي, كۇن ساناپ دەڭگەيى ارتىپ كەلەدى. ەندىگى ماقسات – تيتۋلدى ايقاس وتكىزۋ. شامامەن كەلەسى ايعا جوسپارلاپ وتىرمىز. بىراق تاعى ءبىر ايتا كەتەرىم, قارجى جاعىنان ازداپ قينالىپ وتىرمىز. ال فيزيكالىق جانە مورالدىق تۇرعىدان ول بارىنە دايىن. مۇرنىن ەمدەگەننەن كەيىن جاتتىعۋلارىنا قايتا كىرىسەدى», – دەدى سەرگەي زاۆيلەيسكي. ايتا كەتەيىك, 4 ناۋرىز كۇنى فيرۋزا رەسەيلىك قارسىلاسىن التى راۋندتىڭ قورىتىندىسى بويىنشا تورەشىلەردىڭ ءبىراۋىز شەشىمىمەن جەڭگەن بولاتىن.