سەرىك ساپيەۆ: فيرۋزا ءشارىپوۆا جوعارى دەڭگەيدە جۇدىرىقتاستى

لوندون وليمپياداسىنىڭ چەمپيونى, «استانا ارلانس» بوكس كلۋبىنىڭ بۇرىنعى باسشىسى, قازاقستان پارلامەنتى ءماجىلىسىنىڭ دەپۋتاتى سەرىك ساپيەۆ قازاقستاندىق كاسىپقوي بوكسشى فيرۋزا ءشارىپوۆانىڭ رەسەيلىك يۋليا چەرنوبورودوۆاعا قارسى جەڭىسى جايلى پىكىر ءبىلدردى. بۇل تۋرالى allfight.ru حابارلادى. «فيرۋزانىڭ ايقاسىن جىبەرمەي كوردىم. جوعارى دەڭگەيدە وتكىزدى دەپ سەنىمدى تۇردە ايتا الامىن. ءاربىر جەكپە-جەگىندە جاڭا ءبىر دەڭگەيگە كوتەرىلگەنىن بايقايمىن. سەنىمدىلىگى دە ارتقان. جىلدام قوزعالىپ ۇيرەنگەنىن بايقادىم. شاماسى, بۇل جاڭا باپكەرىنىڭ ۇيرەتكەنى بولار. سونىمەن قاتار, ءشارىپوۆانىڭ رينگكە شىققانداعى مۋزىكاسى (دەميان جانە نازاربەك ورازبەكوۆ «الەم چەمپيوناتى») ۇنادى. ول ءان 2013 جىلى الەم چەمپيوناتىندا دا قويىلعان», – دەدى ساپيەۆ. «ءشارىپوۆا لايىقتى تۇردە جەڭىسكە جەتتى دەپ ويلايمىن. سەنىمدى تۇردە بوكستاسىپ, قارسىلاسىن ءجيى قىسىمعا الدى. بىراق ونىڭ بىرنەشە سوققى جىبەرىپ العان ساتتەرى دە بولدى. چەرنوبورودوۆانى وسال بوكسشى دەپ ايتۋعا كەلمەس. قاجەت كەزىندە قارسى شابۋىلدارعا شىعىپ تۇردى», – دەدى ول «فيرۋزانى جەڭىسىمەن قۇتتىقتايمىن. ونىڭ شارشى الاڭداعى مانسابىنىڭ العا جىلجۋىنا سەپتىگىن تيگىزىپ جۇرگەن, سونداي-اق قازاقستان قىزدارى اراسىنداعى بوكسىنىڭ دامۋىنا ۇلەسىن قوسىپ جۇرگەن مەنەدجەرى سەرگەي زاۆيلەيسكيگە العىسىمدى بىلدىرگىم كەلەدى. وتانداسىمىزعا الداعى ۋاقىتتا تەك جەڭىستەر تىلەيمىن! ەندى فيرۋزا ەلىمىزدە وتەتىن بوكس كەشتەرىنىڭ بىرىنە قاتىسسا ەكەن دەيمىن», – دەدى ءماجىلىس دەپۋتاتى. 4 ناۋرىز كۇنى ماسكەۋ ماڭىنداعى «بالاشيحا» ارەناسىندا فيرۋزا ءشارىپوۆا رەسەيلىك يۋليا چەرنوبورودوۆانى التى راۋندتىڭ قورىتىندىسى بويىنشا تورەشىلەردىڭ ءبىراۋىز شەشىمىمەن جەڭگەن. سونداي-اق, وتانداسىمىزدىڭ شارشى الاڭعا جاراقات العان كۇيىندە شىققانى بەلگىلى بولدى. ايتا كەتەيىك, بيىل استانادا وتەتىن ەكسپو كورمەسى كەزىندە ۇيىمداستىرىلاتىن بوكس كەشىندە ول كەزەكتى رەت رينگكە شىعۋى مۇمكىن.