كونفەرەنتسياعا قازاقستاننىڭ فيزيكالىق گەوگرافياسى مەن ەكولوگياسىن, تابيعاتتى زەرتتەۋمەن شۇعىلداناتىن جوعارى وقۋ ورىندارىنىڭ پروفەسسور-وقىتۋشىلارى, رەسەي, ازەربايجان, وزبەكستان جانە تاعى باسقا الىس-جاقىن شەتەلدەردەن ارنايى شاقىرتىلعان عالىمدار قاتىستى. جيىن بارىسىندا قازىرگى جاراتىلىستانۋ جانە گەوگرافيا عىلىمدارىنىڭ كەلەلى ماسەلەلەرى تالقىلانىپ, مازمۇندى باياندامالار جاسالدى. عىلىممەن بىرگە ۇستاز دەگەن ۇلاعاتتى اتتى بيىك ۇستاپ كەلە جاتقان ءاليا سارسەنقىزى شاكىرتتەرىنىڭ بويىنا ءبىلىم نارىمەن بىرگە جاقسى قاسيەتتەردى دە ءسىڭىرىپ, كاسىبى مەن كىسىلىكتى قاتار ۇستانۋدى ومىرلىك قاعيداسىنا اينالدىرۋعا ۇيرەتكەن بىرەگەي عالىم. ونىڭ جەتەكشىلىگىمەن 3 دوكتورلىق, 14 كانديداتتىق ەڭبەك قورعالعان.
ءا.بەيسەنوۆانىڭ عىلىمي-پەداگوگتىك قىزمەتىنىڭ ۇلكەن ءبىر سالاسى قازاقستانداعى جوعارى وقۋ ورىندارى مەن ورتا مەكتەپ ءۇشىن وقۋلىقتار مەن وقۋ قۇرالدارىن, باعدارلامالار جاساۋ جانە ونى باستىرۋ ىسىمەن تىعىز بايلانىستى ەكەنى انىق. مەكتەپ وقۋشىلارىنىڭ بىرنەشە بۋىنى وسى وقۋلىقتارمەن ءوستى, عالىمنىڭ ىزدەنىسىمەن دۇنيەگە كەلگەن «قازاقستاننىڭ گەوگرافيالىق اتلاسىمەن» تانىمىن كەڭەيتتى. قازاقستان ەكولوگياسىن زەرتتەۋ سالاسىنداعى ەڭبەكتەرى ءۇشىن امەريكانىڭ بيوگرافيالىق ينستيتۋتى ءاليا سارسەنقىزىن «2006 جىل ايەلى» دەپ تانىپ, ونى ارناۋلى مەدالمەن ماراپاتتاعان. ول 600-گە جۋىق عىلىمي ەڭبەكتىڭ اۆتورى, ونىڭ ىشىندە مونوگرافيالارى مەن وقۋلىقتارىنىڭ ءوزى 20-دان اسادى.
جيىنعا كەلگەن عالىمدار, مەيماندار اكادەميكتىڭ ءبىر بويىنان كورىنىس تاباتىن سان ءتۇرلى اسىل قاسيەتى تۋرالى تەبىرەنە اڭگىمەلەدى. ەلىمىزدىڭ جاراتىلىستانۋ عىلىمىن دامىتۋعا سۇبەلى ۇلەس قوسىپ كەلە جاتقان ءاليا بەيسەنوۆانىڭ قۇداي بەرگەن تالانتى, ىسكەرلىگى, بيىك ينتەللەكتۋالدىق قابىلەتى ادامي ادالدىعىمەن قوسىلىپ, ونى ءوز ۇرپاعىنىڭ الدىڭعى قاتارىنا شىعارعانىن كونفەرەنتسيا قاتىسۋشىلارى ءبىر اۋىزدان قۋاتتاپ, عيبراتتى عۇمىرىنا سۇيىسپەنشىلىك ءبىلدىردى.
ايگۇل احانبايقىزى,
«ەگەمەن قازاقستان»
الماتى
