الماتىدان ورالعا شىققان ۇشاق اقتوبەگە شۇعىل تۇردە قوندى

الماتىدان ورال قالاسىنا ۇشىپ شىققان ۇشاق بۇگىن شۇعىل تۇردە اقتوبە قالاسىنا قوندى. وقيعانىڭ سەبەبىن قر ينۆەستيتسيالار جانە دامۋ مينيسترلىگىنىڭ وكىلدەرى ناقتىلاۋدا, دەپ حابارلايدى قازاقپارات. قر ينۆەستيتسيالار جانە دامۋ مينيسترلىگىنىڭ ءباسپاسوز قىزمەتى كولىك اپاتتارى مەن وقيعالارىن تەكسەرۋ دەپارتامەنتىنىڭ وكىلدەرى وسى ماسەلە بويىنشا ءتيىستى جۇمىستار جۇرگىزىپ جاتقاندىعىن اتاپ ءوتتى. «يا, «ەير استانا» اۋە كومپانياسىنىڭ الماتى-ورال باعىتىمەن ۇشقان ۇشاعىنىڭ بورتتاعى كومپيۋتەرى قوزعالتقىشتا اقاۋ بار ەكەندىگىن كورسەتكەن. سول سەبەپتى ەكيپاج مۇشەلەرى اقتوبەگە قونۋ قاجەت دەگەن شەشىم قابىلدادى. وسى ۋاقىتتا ۇشاق قاجەتتى جەرىنە ءساتتى قونىپ ۇلگەردى. ەندى مينيسترلىكتە اتالمىش وقيعانىڭ سەبەپ-سالدارىن انىقتاۋ بويىنشا ارنايى كوميسسيا قۇرىلادى», - دەدى ۆەدومستۆونىڭ ءباسپاسوز قىزمەتى. بورتىندا 76 جولاۋشىسى بار ۇشاق 12 ساعات 40 مينۋتتا قاجەتتى جەرىنە ءساتتى قونعان.