ەلوردادا سۋ قۇبىرى اپاتىنا كىنالىلەر انىقتالدى

قوبىلاندى باتىر كوشەسى بويىنشا 11 ءۇيدىڭ تۇرعىندارىن سۋسىز قالدىرعان كوممۋنالدىق اپاتقا قۇرىلىس كومپانياسى كىنالى, - دەپ حابارلادى «استانا سۋ ارناسى» مكك ءباسپاسوز قىزمەتى. «4 ناۋرىزدا ساعات 16.10-دا «كومپانيا سويۋز XXI» جشس قۇرىلىس جۇمىستارىن جۇرگىزۋ بارىسىندا ديامەترى 500 مم سۋ قۇبىرىن زاقىمداعان. سونىڭ سالدارىنان 4 جەكەمەنشىك ءۇيدى سۋ باستى. جوندەۋ جۇمىستارىنا «استانا سۋ ارناسى» مكك 30-دان استام قىزمەتكەرى, سۋ قۇبىرى جەلىسى بويىنشا سۋ ايدايتىن 21 تەحنيكا جۇمىلدىرىلدى», - دەلىنگەن حابارلامادا. سونداي-اق «كومپانيا سويۋز XXI» ورتالىق سۋمەن جابدىقتاۋ جۇيەسىنە سۋ قۇبىرىن سالۋ جۇمىستارىن ءوز ەركىمەن, رۇقساتسىز جۇرگىزگەن. ايتا كەتەيىك, 4 ناۋرىزدا اۋدان اكىمى ادىلبەك سارسەمباەۆ «الماتى» اۋدانىندا تۇرعىن ءۇي كەشەنىنىڭ 11 بلوگى اپات بولۋىنىڭ سالدارىنان سۋسىز قالعانىن حابارلاعان. «قازىر سۋ ايداۋعا 20 بىرلىك اسسەنيزاتور ماشينالارى تارتىلدى. 900 پاتەر, ءىشىنارا جەكە سەكتوردىڭ 4 كوشەسىنە سۋ اجىراتىلعان», - دەدى اكىم.