ديماش قۇدايبەرگەن ورىنداعان "دايديداۋ" ءانىنىڭ ۆيدەوسى جاريالاندى

قىتايدىڭ حۋنان تەلەارناسىنىڭ «I'm a Singer» بايقاۋىنىڭ جەتىنشى كەزەڭى ەفيردەن كورسەتىلدى. جوباعا قاتىسىپ جاتقان قازاقستاندىق ءانشى ديماش قۇدايبەرگەن قازاق ۇلتتىق مۋزىكا اسپاپتار وركەسترىنىڭ سۇيەمەلدەۋىمەن «دايديداۋ» ءانىن شىرقادى. ديماش "دايديداۋ" ءانىن ايتپاس بۇرىن دومبىرامەن قۇرمانعازىنىڭ "اداي" كۇيىن شەرتىپ, ءدۇيىم جۇرتتى تاڭ قالدىردى. بۇعان دەيىن ول لارا فابياننىڭ "اداجيو" ءانىن ايتقاندا پيانينودا ويناعان بولاتىن. جەتىنشى كەزەڭنىڭ قورىتىندىسىندا ءبىرىنشى ورىندى گونگوكتىق Sandy السا, جوباعا جاقىندا عانا قوسىلعان قىتاي ءانشىسى لي تسيان ەكىنشى ورىنعا يە بولدى. ال چجان بيچجەن جوبادان شىعىپ قالدى. جوبانىڭ ىرىكتەۋ باسەكەسىنىڭ ءتورت اينالىمى (8 كەزەڭى) ءوز مارەسىنە جەتتى. جوباعا قاتىسۋشى باستاپقى جەتى انشىدەن تەك ءۇش ادام قالدى. الدا تەك ەكى كەزەڭ بار. سەگىزىنشى كەزەڭدە ديماش تاماعىنىڭ اۋىرۋىنا قاراماي, قىتايشا «تاڭ» اتتى ءانىن ورىنداپ شىقتى. قازاقپارات مالىمەتى بويىنشا ءتورتىنشى اينالىمنىڭ (جەتىنشى جانە سەگىزىنشى كەزەڭ) قورىتىندىسى بويىنشا ديماش جالپى ەسەپتە بەسىنشى ورىنعا تۇراقتادى.