دۇنيەجۇزىلىك بوكس سەرياسى: انتون پينچۋك جەڭىسپەن اياقتادى

اتىراۋدا ءوتىپ جاتقان دۇنيەجۇزىلىك بوكس سەرياسىندا (WSB) قازاقستاندىق «Astana Arlans» پەن قىتايلىق «China Dragons» كوماندالارى قولعاپ ءتۇيىستىردى. سوڭعى بولىپ شارشى الاڭعا اۋىر سالماقتا (91 كگ) انتون پينچۋك پەن قىتاي ۇجىمىنىڭ اتىنان سەرگەي نوۆيكوۆ شىقتى. ءبىرىنشى راۋندتىڭ باسىندا قوس بوكسشى ءبىر-ءبىرىن اڭدىسۋىمەن ءجۇرىپ, ايتارلىقتاي شابۋىلعا شىعا قويماعان. بىراق باستاپقى ءۇش مينۋتتىڭ سوڭىنا تامان انتون پينچۋك العا ۇمتىلىپ, بىرنەشە سوققىسىن ءدال تيگىزە ءبىلدى. ەكىنشى راۋندتا سەرگەي نوۆيكوۆ ايتارلىقتاي ەشنارسە ىستەي المادى. بويى مەن قولىنىڭ ۇزىندىعىن ءتيىمدى پايدالانا بىلمەدى. قايتا وتانداسىمىز انتون پينچۋك بۇرىشقا تاقاپ الىپ, سوققىلاۋمەن بولدى. كەلەسى راۋندتا ءدال وسى باعىتتا ءوربىدى. وتانداسىمىز دجەب سوققىلارىن ءدال تيگىزىپ جاتتى. نوۆيكوۆتىڭ قارسى سوققىلارىنان جىلدام قيمىلىمەن شىعىپ كەتىپ ءجۇردى. ءتورتىنشى راۋندتا انتون ءسات سايىن العا ۇمتىلىپ, سەرگەيدى بۇرىشقا تىقسىرىپ ءجۇردى. ۇلتى بەلورۋس سپورتشىسىنا ەش مۇمكىندىك بەرە قويمادى. سوڭعى ءۇش مينۋتتا وتانداسىمىز ساق قيمىلداپ, قارسىلاسىنىڭ شابۋىلىنا قارسى ۇمتىلۋدى ماقسات ەتىپ ءجۇردى. دەگەنمەن, قارسىلاسىنىڭ بىرنەشە سوققىسىن وتكىزىپ العان ساتتەر دە بولىپ جاتتى. قورىتىندىسىندا انتون پينچۋك بوكس كەشىن جەڭىسپەن تۇيىندەدى.