دۇنيەجۇزىلىك بوكس سەرياسى: ءىلياس سۇلەيمەنوۆ جەڭىستى جولدى جالعادى

اتىراۋدا ءوتىپ جاتقان دۇنيەجۇزىلىك بوكس سەرياسىندا (WSB) قازاقستاندىق «Astana Arlans» پەن قىتايلىق «China Dragons» كوماندالارى اراسىندا ەكىنشى بولىپ رينگكە 56 كيلودا ءىلياس سۇلەيمەنوۆ پەن ۆان لۋن شىقتى. ءبىرىنشى راۋندتا ءىلياس سۇلەيمەنوۆ جەڭىستى جولدى جالعاستىرۋ ءۇشىن بارىن سالدى. بىرنەشە سوققىسىن دارىتىپ, ۆان لۋنعا ەش مۇمكىندىك بەرە قويمادى. ءوز كەزەگىندە قىتايلىق ارا-تۇرا ۇمتىلعانمەن, ونىسىنان تۇك شىقپادى. ەكىنشى راۋندتا دا ءىلياستىڭ مەرەيى ۇستەم بولدى. الىستان دا, جاقىننان دا قارسىلاسىن تومپەشتەۋمەن بولدى. كەلەسى راۋندتا ۆان لۋن جابىق تۇردە بوكستاستى. وتانداسىمىز ەكى قولىن سالبىراتىپ, شابۋىلداۋىنا ەرىك بەرسە دە اسپاناستى ەلىنىڭ سپورتشىسى سەنىمدى تۇردە ايقاسا المادى. سۇلەيمەنوۆ ىڭعايى كەلگەن ۋاقىتتا ۆان لۋننىڭ بۇيىرلەرىنەن دە سوققىلارىن دارىتا ءبىلدى. كەلەسى ءۇش مينۋتتا وتانداسىمىز قارسىلاسىنىڭ قورعانىسىن بۇزىپ كىرىپ, بىرنەشە رەت ءدال سوققىسىن تيگىزە ءبىلدى. قىتاي سپورتشىسىنىڭ العاشقى راۋندتاعى قارقىنى باسەڭدەپ قالدى. باسىن تومەن سالبىراتىپ الىپ, ءىلياستىڭ قولتىعىنا كىرىپ كەتۋمەن بولدى. سوڭعى راۋندتا جەرلەسىمىز باسىمدىعىن بەرە قويمادى. دەگەنمەن, ءبىر-ەكى سوققىسىن وتكىزىپ الدى. قورىتىندىسىندا ءىلياس سۇلەيمەنوۆ ايقىن باسىمدىقپەن جەڭىسكە جەتتى.