قازاقستان استىعىنىڭ ءبىرىنشى پارتياسى ۆەتنامعا جەتتى

بۇگىن استانا ۋاقىتى بويىنشا ساعات 08:00-دە 32 كونتەينەرمەن كولەمى 720 توننا بولاتىن قازاقستاندىق استىقتىڭ ءبىرىنشى پارتياسى شىعىسقىتايلىق ليانيۋنگان پورتىنان ۆەتنامنىڭ حوشيمين پورتىنا كەلدى, دەپ حابارلادى قازاقپارات. VICT تەرمينالىندا سالتاناتتى تۇردە جۇكتى قارسى الۋ راسىمىندە قازاقستاننىڭ ۆەتنامداعى توتەنشە جانە وكىلەتتى ەلشىسى بەكەتجان جۇماحانوۆ, VICT First logistics development (JV) Co. باس ديرەكتورى گلەن كۋن ۆاي كەون, «ليانيۋنگان قالاسىنىڭ قىتايلىق-قازاقستاندىق حالىقارالىق لوگيستيكالىق كومپانياسىنىڭ» باس ديرەكتورى ليۋ بين, ۆەتنامدىق استىق ساتىپ الاتىن كومپانيا وكىلدەرى, جەرگىلىكتى تەلەارنالار تىلشىلەرى, قحر-دا اككرەديتتەلگەن قازاقستاندىق جۋرناليستەر قاتىستى. «بۇل ۆەتنام مەن ەاەو اراسىنداعى ەركىن ساۋدا ايماعى تۋرالى قول قويىلعان كەلىسىم اياسىندا قىتايلىق ليانيۋنگان پورتى ارقىلى «قتج» ۇك» كومپانياسىنىڭ ەنشىلەس كاسىپورنى «KTZ Express» اق-نىڭ ۆەتنامعا قازاقستاندىق ءونىمدى العاشقى رەت جەتكىزۋى. نەگىزگى مىندەت - جۇكتى ۆەتنامعا جەتكىزۋ عانا ەمەس, قىتاي اۋماعى ارقىلى وڭتۇستىك-شىعىس ازياعا تاۋارلاردى جەتكىزۋدىڭ لوگيستيكالىق مارشرۋتىن تەستىدەن وتكىزۋ. ءبىز نارىققا تەك استىق قانا ەمەس, ازىق-ت ۇلىك ونىمدەرىنىڭ باسقا دا تۇرلەرىن جەتكىزۋگە ءازىرمىز», - دەدى بەكەتجان جۇماحانوۆ. ونىڭ ايتۋىنشا, قازاقستان ءوز ءونىمىن ەكسپورتتاپ قانا قويمايدى, سونىمەن بىرگە ەاەو-عا مۇشە باسقا دا مەملەكەتتەردىڭ تاۋارلارىن «قازاقستان - ليانيۋنگان (قحر) پورتى - ۆەتنام» كولىكتىك ءدالىزى ارقىلى ۆەتنامعا جانە وڭتۇستىك-شىعىس ازيا ەلدەرىنە جەتكىزەدى. «ءوڭىر حالقى 600 ميلليونعا جۋىق. سوندىقتان قازاقستاندىق بيزنەس ءۇشىن جاقسى پەرسپەكتيۆالار اشىلۋدا», - دەپ تۇيىندەدى ءسوزىن ديپلومات.