ءاسانالى ءاشىموۆ وڭتۇستىك قازاقستاننىڭ «قۇرمەتتى ازاماتى» اتاندى

وڭتۇستىك قازاقستان وبلىستىق «جاستار رەسۋرستىق ورتالىعىندا» قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءاسانالى ءاشىموۆتىڭ «اڭىزعا اينالعان ءاسانالى» اتتى شىعارماشىلىق كەشى ءوتتى, دەپ حابارلايدى وقو اكىمىنىڭ ءباسپاسوز قىزمەتى. شاراعا وبلىس اكىمى جانسەيىت تۇيمەباەۆ ارنايى قاتىسىپ, ۇلتتىق ساحنا جانە كينوونەرىنىڭ دارابوزى, اتى اڭىزعا اينالعان ءبىرتۋار تۇلعانى 80 جىلدىق مەرەيتويىمەن ارنايى قۇتتىقتادى. «وسىناۋ مەرەيلى كۇندە ەلىمىزگە سىڭىرگەن ادال دا ابىرويلى ەڭبەگىڭىز ءۇشىن شىنايى العىسىمدى بىلدىرەمىن. سىزگە وڭتۇستىك قازاقستان وبلىسى تۇرعىندارىنىڭ اتىنان, ميلليونداعان جانكۇيەرلەرىڭىزدىڭ اتىنان «وڭتۇستىك قازاقستان وبلىسىنىڭ قۇرمەتتى ازاماتى» اتاعىن تابىس ەتۋگە رۇقسات ەتىڭىز. سىزگە زور دەنساۋلىق, جاڭا شىعارماشىلىق تابىستار, وتباسىڭىزعا بەرەكە, باياندى باقىت تىلەيمىن», - دەدى جانسەيىت قانسەيىت ۇلى. ايماق باسشىسى مەرەيتوي يەسىنىڭ يىعىنا قازاقى شاپان جاۋىپ, استىنا ات مىنگىزدى. كەش ت.جۇرگەنوۆ اتىنداعى قازاق ۇلتتىق ونەر اكادەمياسى ستۋدەنتتەرىنىڭ «اڭىزعا اينالعان ءاسانالى» اتتى تەاترلاندىرىلعان مۋزىكالىق قويىلىمىمەن جالعاستى. ايتا كەتەيىك, ءاسانالى ءاشىموۆ 1961 جىلى قۇرمانعازى اتىنداعى قازاق مەملەكەتتىك ۇلتتىق كونسەرۆاتورياسىنىڭ تەاتر فاكۋلتەتىن اكتەر ماماندىعى بويىنشا ءبىتىرىپ, «قازاقفيلم» كينوستۋدياسىنا جۇمىسقا قابىلداندى. اكتەر ويناعان «ءان قاناتىندا», «قىز جىبەك», «اتاماننىڭ اقىرى», «ءترانسسىبىر جۇردەك پويىزى», «جاۋشى», «نان ءدامى», «قازاقى وقيعا», «ءسىز كىمسىز, كا مىرزا؟», كوپ سەريالى «بۇلعارلار تۋرالى بايان» فيلمدەرى قازاق كينوسىنىڭ دامۋىنا زور ۇلەسىن قوستى. اتاقتى اكتەر تەاتر ساحناسىندا م.اۋەزوۆتىڭ «ابايىن» كەرىم, «ەڭلىك-كەبەگىندە» كەبەك, «قارا قىپشاق قوبىلاندىسىندا» ايشۋاق, «تاڭعى جاڭعىرىعىندا» جاراسباي, ع.مۇسىرەپوۆتىڭ «قوزى كورپەش - بايان سۇلۋىندا» قودار, ق.مۇحامەدجانوۆ, ش.ايتماتوۆتىڭ «كوكتوبەدەگى كەزدەسۋىندە» يوسيف تاتاەۆيچ, شەكسپيردىڭ «يۋلي تسەزارىندە» يۋلي تسەزار, م.ءفريشتىڭ «دون جۋاننىڭ دۋمانىندا» دون جۋان, ءا.نۇرپەيىسوۆتىڭ «قان مەن تەرىندە» ەلامان سىندى كەيىپكەرلەرىن سومداعان. ودان بولەك گ.گاۋپتماننىڭ «ىمىرتتاعى ماحاببات» دراماسىنداعى دوكتور كلاۋزەن ءرولىن اسقان شەبەرلىكپەن سومداپ, تەاتر تاريحىنان ويىپ ورىن العان تۇلعا.