ءوز ەلىمنىڭ ىستىق ىقىلاسىنا ەشتەڭە جەتپەيدى

جاسىراتىنى جوق, بالەت, وپەرا سياقتى بەكزات ونەردى ايماقتاعى اعايىندار تۇسىنبەيدى دەپ ويلايمىز. تۇسىنبەگەن سوڭ كىم كورەدى, كىم تىڭدايدى, كىم كەلەدى دەگەن ويدىڭ دا قىلاڭ بەرەتىنى راس. مىنە, وسى قاساڭ تۇسىنىكتى سوڭعى ەكى اپتادان بەرى ايماقتارعا گاسترولدىك ساپارمەن شىعىپ, ونەر كورسەتىپ جۇرگەن «استانا بالەت» تەاترى جوققا شىعارعانداي. بۇل ونەر شا­ڭىراعى اقتوبە, قوستاناي جانە كوكشەتاۋ قالالارىندا «استانا بالەت GALA» باعدارلاماسى بويىن­شا كونتسەرتتەر قويىپ, جۇرتتىڭ ىس­تىق ىقىلاسىنا يە بولدى. بالەت ونەرىن كورۋگە كەلگەن جۇرتتىڭ قاراسى كوپ بولعاندىقتان, بارلىق كونتسەرتتەردە كورەرمەن زالىنا قوسىمشا ورىندىقتار قويۋعا تۋرا كەلدى. بۇل كونتسەرتتىك باعدارلاماعا تانىمال حورەوگرافيالىق مينياتيۋرالار مەن ءبىر اكتىلى بالەتتەردىڭ ۇزىندىلەرى ەنگەن. تاعى ءبىر ايتارى, باعدارلامانىڭ ساپاسى مەن تەحنيكالىق بەزەندىرىلۋى ءدال ەلوردالىق ساحناداعىداي جاسالدى. ءبىرىنشى بولىمدە ۇلتتىق تاقىرىپ اياسىنداعى حورەوگرافيالىق مينياتيۋرالار مەن بالەت ۇزىندىلەرى كورسەتىلدى. ءاربىر نومىردە حا­لىق­تىڭ مۋزىكالىق سارىندارى مەن ەستەتيكاسى اڭعارىلىپ, ۇلتتىق ناقىشقا تولى بولۋى تەاتر رەپەرتۋارىنداعى ءبيدىڭ ءداستۇرلى تاسىلدەرىنىڭ ساقتالىپ, ۇلتتىق حورەوگرافياعا جاڭا تىنىس بىتكەنىن بايقاتقانداي. ەكىنشى بولىمدە كورەرمەندەر بەلگيالىق حورەوگراف ريكاردو امورانتەنىڭ «GAIA» بالەتىن تاماشالادى. وسى تۇستا ايگىلى بالەت سىنشىسى دجەسسيكا تيگ «DanceEurope» جۋرنالىنا جازعان ماقالاسىندا «استانا بالەت» تەاترىنىڭ رەپەرتۋارى جايلى ايتا كەلىپ, ونىڭ قازاقستاننىڭ كلاسسيكالىق بالەت داستۇرلەرىنە يەك ارتا وتىرىپ, شىعىس پەن با­تىستىڭ ۇيلەسىمى دەگەن باعا بەرگەن بولاتىن. استانالىق بالەت ۇجىمى بۇعان دەيىن ماسكەۋ, سانكت-پەتەربۋرگ, بەيجىڭ, شانحاي, پاريج, ۆەنا, توكيو, سەۋل, نيۋ-يورك, بۋداپەشت, ۆارشاۆا جانە باكۋ ساحنالارىندا ونەر كورسەتىپ, كورەرمەندەر زور قۇرمەت كورسەتكەن ەدى. – «استانا بالەت» تەاترى قازاق­تىڭ ورىن­داۋشىلىق ونە­رىنىڭ ءداستۇرىن ساقتاپ, ونەرگە, ونىڭ ىشىندە, حورەوگرافياعا دەگەن قىزىعۋشىلىقتى ارتتىرۋعا كۇش سالادى, – دەيدى بىزبەن اڭگىمەسىندە تەاتردىڭ باس بالەت­مەيسترى, قازاقستاننىڭ ەڭبەك ءسىڭىر­گەن قايراتكەرى ايگۇل تاتي. – اق­توبە, قوستاناي مەن كوكشەتاۋعا گاسترولدىك ساپار كەزىندە كورەر­مەن قاۋىمعا الەمدىك بالەت تەندەنتسيالارى مەن ترەندتەرىن پاش ەتىپ, زاماناۋي قازاقستاندىق حو­رەو­­گرافيا ونەرىن كورسەتتى. كو­رەر­مەن قاۋىم بي ونەرىنىڭ اسەمدىگى مەن سالتاناتىنا كۋا بولادى. – بىزدە ۇلكەن-كىشى ساحنا دەگەن ۇعىم جوق, – دەيدى بالەت ءانشىسى ديانا باتىروۆا. – قان­داي ساحنادا ونەر كورسەتسەك تە, بار كۇش-جىگەرىمىزدى سالامىز. ءبىزدىڭ باستى سىنشىمىز – ءوز كورەرمەنىمىز. شەتەلدىڭ كوپتەگەن قالالارىندا ونەر كورسەتتىك. دەگەنمەن, تۋعان ەلىمنىڭ ىستىق ىقىلاسىنا ەشتەڭە جەتپەيدى. ورالحان ءداۋىت, «ەگەمەن قازاقستان» استانا