بيىل ەلباسى قورىنىڭ سىيلىعى توعىزىنشى رەت تاپسىرىلىپ وتىر. 2008 جىلى تاعايىندالعان سىيلىققا وسى ۋاقىتقا دەيىن 160-تان استام دارىندى جاس يە بولعان. مادەنيەت پەن ونەر, ءبىلىم مەن عىلىم سالالارىندا جەمىستى ەڭبەك ەتىپ, وزدەرىن مادەني, عىلىمي ورتالاردا تانىتا العان جاستاردىڭ جەتىستىكتەرىن مويىنداۋ, سونداي-اق, ولارعا قولداۋ كورسەتۋ ماقساتىندا تاعايىندالعان بۇل سىيلىققا بيىل دا ەلىمىزدىڭ تۇكپىر-تۇكپىرىنەن ۇمىتكەرلەر كوپ بولعان. قور سىيلىعىن تاعايىندايتىن كوميسسيا 127 ءوتىنىمنىڭ ىشىنەن 18-ءىن ۇزدىك دەپ تاۋىپتى. شارا بارىسىندا سىيلىق يەلەرىنە قۇتتىقتاۋ ءسوز ارناعان قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ اتقارۋشى ديرەكتورى قانات جۇماباەۆ: «پرەزيدەنت قورىنىڭ مىندەتى – جاستاردىڭ جاڭا بۋىنىن قالىپتاستىرۋ. ءبىزدىڭ لاۋرەاتتارىمىز بۇگىنگى كۇنى كاسىبي مامان رەتىندە تانىمال بولىپ وتىرعانى قۋانتادى», دەپ اتاپ ءوتتى.
قوردىڭ بيىلعى سىيلىعى بۇيىرعان ۇمىتكەرلەر اراسىندا «استانا وپەرا» مەملەكەتتىك وپەرا جانە بالەت تەاترىنىڭ جەتەكشى ءسوليسى تالعات مۇساباەۆ, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىنىڭ اكتەرى سىرىم قاشقاباەۆ, «استانا وپەرا» مەملەكەتتىك بالەت جانە وپەرا تەاترى بالەت ترۋپپاسىنىڭ جەتەكشى ءسوليسى ءمادينا باسباەۆا, بۇگىنگى كۇنى قىتايدا ءوتىپ جاتقان «I am a singer» بايقاۋىنا قاتىسىپ, جۇلدەلى بيىكتەن كورىنىپ جاتقان جاس ءانشى ديماش قۇدايبەرگەنوۆ سىندى ونەرلى جاستار بار.
ءبىر ايتا كەتەرلىگى, ەلباسى قورىنىڭ سىيلىعى ونەر مەن عىلىم سالاسىنا تەڭ ءبولىنگەن. ياعني, ونەرلى جاستار مەن عىلىم-ءبىلىمدەگى جاستاردىڭ ارا سالماعى تەڭ ەسەپتەلگەن.
ايگۇل سەيىلوۆا,
«ەگەمەن قازاقستان»
سۋرەتتى تۇسىرگەن
ورىنباي بالمۇرات,
«ەگەمەن قازاقستان»
