مەملەكەت قارجىسى ءتيىمدى يگەرىلۋى ءتيىس

قازاقستان پرەزيدەنتى ءوزىنىڭ وكى­لەتتىگىنىڭ ءبىراز بولىگىن بيلىكتىڭ باس­قا تارماقتارىنا – ۇكىمەت جانە پار­لامەنتكە بەرۋ ارقىلى اۋقىمدى كونس­تيتۋتسيالىق رەفورمانى جۇزەگە اسىرۋدى ۇسىنىپ وتىر. ەلباسىنىڭ بۇل ۇسىنىسى قوعام تاراپىنان قولداپ, قۋاتتالدى. جان-جاقتى تالقىلاندى. ماسەلەن, كونستيتۋتسياعا وزگەرىستەر ەنگىزۋگە قاتىستى 6 مىڭنان استام تۇزەتۋلەر مەن ۇسىنىس-تىلەكتەر كەلىپ ءتۇستى. ولاردىڭ بارلىعى تالقى تارازىسىنان ءوتتى. بۇل وزگەرىستەر ۇكىمەت پەن پارلامەنتتىڭ وكىلەتتىكتەرىن كەڭەيتىپ قانا قويماي, ولاردىڭ جاۋاپكەرشىلىكتەرىن دە ارتتىرا تۇسەتىنى ءسوزسىز. ءدال قازىر بۇل وتە ماڭىزدى. سەبەبى, ولار مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھان­دىق باسەكەگە قابىلەتتىلىك» جول­داۋىندا كوتەرىلگەن ماسەلەلەردى ورىن­داۋعا, جۇزەگە اسىرۋعا باعىتتالۋى ءتيىس. دەمەك, قازىرگى تاڭدا قولعا الىنىپ جاتقان بارلىق رەفورمالاردىڭ وزەگى, مىنە, وسىعان كەلىپ تىرەلەدى. ولار قوعامدى دەموكراتيالاندىرۋ, بارلىق بيلىك تارماعىنىڭ جاۋاپكەرشىلىگىن ارتتىرۋ سەكىلدى تەتىكتەرگە سۇيەنىپ وتىر. بۇگىندە ەگەر, كونستيتۋتسيالىق رەفورمالار جۇزەگە اساتىن بولسا, ۇكىمەتتىڭ پارلامەنت الدىنداعى جاۋاپكەرشىلىگى كۇشەيەتىندىگى جونىندە كوپ ايتىلىپ ءجۇر. بۇل – وتە وزەكتى ماسەلە. پارلامەنت تە وسى ارقىلى ءوز جاۋاپكەرشىلىگىن ارتتىرىپ, باقىلاۋ تەتىگىن نىعايتاتىن بولادى. جاۋاپكەرشىلىكتىڭ ارتۋىن «نۇرلى جول», «نۇرلى جەر» سەكىلدى ماڭىزدى مەملەكەتتىك باعدارلامالاردىڭ قولعا الىنۋىمەن دە بايلانىستىرۋىمىز كەرەك. سەبەبى, بۇل باعدارلامالارعا اۋقىمدى قارجى بولىنەدى, ال مەملەكەت قارجىسىنىڭ ءتيىمدى يگەرىلىپ, دۇرىس ناتيجە كورسەتۋىنە ءتيىستى دەڭگەيدە باقىلاۋ جۇرگىزۋ قاجەت. بۇل رەتتە, ءبىز مىنانى ەسكەرۋىمىز كەرەك. مەملەكەت باسشىسى بيلىك تارماق­تارى اراسىندا وكىلەتتىكتەردى ءبولۋ ارقىلى ولارعا ۇلكەن سەنىم ارتىپ وتىر. تاتيانا ياكوۆلەۆا, پارلامەنت ءماجىلىسىنىڭ دەپۋتاتى