ساياسي جۇيەنى دەموكراتيالاندىرۋداعى ماڭىزدى قادام

كونستيتۋتسيالىق وزگەرىستەردى قازاقستاننىڭ ساياسي جۇيەسىن دەموكراتيالاندىرۋداعى ۇلكەن قادام رەتىندە قاراستىرۋ كەرەك. جالپى, وسى وزگەرىستەرمەن ءبىزدىڭ ساياسي جۇيەمىزدىڭ تيىمدىلىگى, تۇراقتىلىعى مەن تەڭگەرىمدىلىگى ارتاتىنى ءسوزسىز. ەلباسى ءوزىنىڭ ءبىراز وكىلەتتىكتەرىن پارلامەنت پەن ۇكىمەتكە بەرىپ جاتىر, بىراق, بۇل پرەزيدەنتتىك باسقارۋ جۇيەسى السىرەيدى دەگەندى بىلدىرمەيدى. پرەزيدەنتتىك باسقارۋ جۇيەسى ساقتالادى, ەلباسى ەلىمىزدىڭ دامۋىنداعى ستراتەگيالىق جانە ۇلتتىق قاۋىپسىزدىك ماسەلەلەرىنە, سىرتقى ساياساتقا باسىمدىق بەرەتىن بولادى. ال ەكونوميكالىق ساياساتقا قاتىستى كۇندەلىكتى ماسەلەلەر تولىعىمەن ۇكىمەتتىڭ قاراۋىنا وتەدى. ۇكىمەت بۇل ماسەلەلەرگە تيىسىنشە ءوزى جاۋاپ بەرەتىن بولادى. كونستيتۋتسياعا ەنگىزىلىپ جاتقان وزگەرىستەردى ءبىر جاعىنان, حالىقتىڭ بيلىكتى قالىپتاستىرۋداعى ءرولىن كۇشەيتۋ دەپ تە باعامداۋعا بولادى. ويتكەنى, وزگەرىستەر جۇزەگە اسسا, تيىسىنشە, پارلامەنتتىڭ وكىلەتتىلىگى كۇشەيەدى. ماسەلەن, پارلامەنت ۇكىمەتتى جاساقتاۋ ۇدەرىسىنە دە قاتىساتىن بولادى. پارلامەنت ۇكىمەتكە باقىلاۋ جاساپ وتىرسا, سول ارقىلى حالىقتىڭ بيلىكتى قالىپتاستىرۋعا, ەكىنشى جاعىنان, باقىلاۋعا بايلانىستى مۇمكىندىكتەرى ارتادى دەپ قاراستىرۋ كەرەك. سوندىقتان, بۇل وزگەرىستەردى ءبىزدىڭ ساياسي جۇيەمىزدى دەموكراتيالاندىرۋ ۇدەرىسىندەگى ماڭىزدى دا ۇلكەن قادام دەپ سانايمىن. ماۋلەن اشىمباەۆ, پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى