جالپىحالىقتىق تالقىلاۋ وي مەن ءسوز ەركىندىگىنىڭ كورىنىسى

قازاقستان رەسپۋبليكاسى پارلامەنتىنىڭ قوس پالاتاسىنىڭ بىرلەسكەن وتىرىسىندا ەل تاعدىرىنىڭ اسا ماڭىزدى ماسەلەسى قازاقستان رەسپۋبليكاسى كونستيتۋتسياسىنا وزگەرىستەر ەنگىزۋ جونىندەگى ماسەلە قارالدى. ءوز سوزىندە ەلباسى نۇرسۇلتان ءابىش ۇلى نازارباەۆ كونستيتۋتسيالىق وزگەرىستەردىڭ تاريحي ماڭىزى جونىندە ۇلاعاتتى ءسوز ايتتى. قازاقستاننىڭ كەزەكتى دەموكراتيالىق قادامى كەزىندە كونستيتۋتسيالىق وزگەرىستەرگە بۇكىلحالىقتىق تالقىلاۋ بارىسىندا كەلىپ تۇسكەن ۇسىنىستاردىڭ بارلىعى ەگجەي-تەگجەيلى زەرتتەلىپ, ولاردىڭ بارلىعى دا وسى قوس پالاتانىڭ بىرلەسكەن وتىرىسىنا ۇسىنىلىپ وتىرعانىن ەلباسى ءوز سوزىندە ايتىپ ءوتتى. ءبىزدىڭ قوعام ءوسىپ-وركەندەپ, تاۋەلسىزدىگىمىزدىڭ جيىرما بەس جىلدىعىندا الەمدىك ارەناعا تانىلعان مەملەكەتتەردىڭ بىرىنە اينالدى. ەلباسى وسى كونستيتۋتسيالىق رەفورمالاردى بۇكىلحالىقتىق تالقىلاۋعا ۇسىنعان كەزىندە سويلەگەن سوزىندە «دۇنيە وزگەرىپ كەلە جاتىر. سوندىقتان ءبىز دە زاماننىڭ ۇدەرىسىنە قاراي, زامان­نىڭ تالابىنا قاراي ءوزىمىزدىڭ مەملەكەتتىك جۇيەمىزدى وزگەر­تەتىن رەفورمالار جاساۋىمىز كەرەك», دەگەن بولاتىن. وسى جولعى تالقىلاۋعا بۇكىل قوعامدىق ۇيىمداردىڭ, بارلىق قازاق­ستان­دىقتاردىڭ وي-پىكىرلەرىنىڭ اشىق ايتىلۋىنا جاعداي جاسال­عانىن كورىپ وتىرمىز. باسپاسوزدە, تەلەديداردا, ينتەرنەت جەلى­لەردە وسى ماسەلە ايقىن تالقىلاندى. وسىعان قاراعاندا قازاق­ستاندىق قوعامنىڭ دەموكراتيالانۋى, مەملەكەتتىكتىڭ نىعايعانى, ەلىمىزدەگى ىنتىماق پەن بىرلىكتىڭ نىعايعانى بايقالادى. قوس پالاتانىڭ بىرلەسكەن وتىرىسىندا كۇن تارتىبىنە قويىلعان ماسەلە ءبىزدىڭ ماڭگىلىك ەل بولۋعا, ەڭ دامىعان وتىز ەلدىڭ قاتارىنا قوسىلۋ جولىندا ءوزىمىزدىڭ ەلدىك مۇددەمىزدى ورىنداۋعا تولىق مۇمكىندىك بەرەتىن وزگەرىس بولاتىنىنا بەك سەنىمدىمىز. جابال ەرعاليەۆ, پارلامەنت سەناتىنىڭ دەپۋتاتى