سولتۇستىك قازاقستاندا سۋ تاسقىنىن عارىشتان باقىلاۋعا بولادى

سولتۇستىك قازاقستان وبلىسىندا ناۋرىز ايىنىڭ سوڭىنا تامان سۋ تاسقىنى بولادى دەپ كۇتىلۋدە, دەپ حابارلايدى «قازاقپارات». «قازگيدرومەتتىڭ» دەرەگى بويىنشا, وڭىردە جىلى تسيكلوننىڭ ىقپالىمەن اۋا تەمپەراتۋراسى +8 گرادۋسقا دەيىن جىلىنادى. كوكتەم ەرتە كەلىپ, قار ەري باستايدى. بيىل جەكەلەگەن اۋدانداردا قار كوپ جاۋىپ, مۇز قالىڭدىعى نورمادان ەكى-ءۇش ەسەگە ارتقان. «2016 جىلعى سۋ تاسقىنىن ەسكەرگەن ءجون. ەرىگەن قار ەشقايدا اعىپ كەتپەگەن. وعان م.جۇماباەۆ اۋدانى بۋلاەۆو قالاسىنىڭ ورتالىعىنداعى كول دالەل بولا الادى. ول قازىرگە دەيىن تولىپ تۇر. ونىڭ جان-جاعىنان بوگەت سالىندى. الايدا, تاسقىننىڭ قاۋپى سەيىلمەدى. ەرىگەن قار سۋى تۇرعىن ۇيلەردى شايىپ كەتۋى مۇمكىن. سۋ تاسقىنى قاۋپى بار بەلدەۋدە 20 ءۇي ورنالاسقان», - دەدى سقو تجد ازاماتتىق قورعانىس باسقارماسىنىڭ باسشىسى اسحات ەرجانوۆ. وسىنداي قيىن جاعداي كامىشلوۆ سايىندا ورىن الۋى مۇمكىن, سەبەبى تارانكول كولىنىڭ سۋى وسى سايعا قاراي اعادى. اسحات ەرجانوۆ اتاپ وتكەندەي, سايدىڭ ماڭايىندا بىرنەشە ەلدى مەكەن ورنالاسقان. كامىشلوۆ سايىنداعى ەرىگەن قار سۋلارىنان تەمىرجول مەن رەسپۋبليكالىق ماڭىزى بار «پەتروپاۆل-استانا» تاسجولى زارداپ شەگۋى مۇمكىن. قۇتقارۋشىلار كوكتەمگى سۋ تاسقىنىنا دايىن ەكەندىكتەرىن ايتۋدا. وتكەن جىلدىڭ جاز مەزگىلىنەن بەرى كۇردەلى ۋچاسكەلەرگە تالداۋ جاسالىپ, سۋ تاسقىنى قاۋپى بار 95 ەلدى مەكەن انىقتالعان. ول ايماقتاردا قاجەتتى ينجەنەرلىك جۇمىستار جۇرگىزىلدى. ەلدى مەكەندەردەگى قارلار شىعارىلدى. ەۆاكۋاتسيالىق كوميسسيا قۇرىلىپ, اپتا سايىن ءوڭىر باسشىسىنىڭ الدىندا اۋدان اكىمدەرى جاسالعان جۇمىستار تۋرالى ەسەپ بەرۋدە. «سۋ تاسقىنىنىڭ دايىندىق جۇمىستارىنا جۇمسالاتىن قارجىنى جەرگىلىكتى اتقارۋشى ورگاندار جوسپارلاپ قويدى. موتوپومپالار ساتىپ الىنۋدا», - دەدى اسحات ەرجانوۆ. وڭىردەگى بارلىق ەلدى مەكەندەردەگى جاعدايلار باقىلاۋعا الىنعان. شتابتار, باقىلاۋ قىزمەتتەرى قۇرىلدى. ءار اۋداندا گيدرومەتەورولوگيالىق بەكەتتەر جۇمىس جاساۋدا. «ءبىز سۋ تاسقىنىنان زارداپ شەگۋى مۇمكىن ەڭ قاۋىپتى ەلدى مەكەندى انىقتادىق. بىزدە سپۋتنيك ارقىلى ءوڭىرىمىزدىڭ بارلىق اۋماعىن قاداعالاپ وتىرۋعا مۇمكىندىك بەرەتىن عارىشتىق باقىلاۋ بار. سۋ تاسقىنى بارىسىندا عارىشتىق باقىلاۋدىڭ كومەگىمەن قاي اۋماقتا سۋدىڭ كوپ جينالىپ قالعاندىعىن انىقتاپ, سايكەسىنشە ارەكەت ەتۋگە مۇمكىندىك بار», - دەپ اتاپ ءوتتى اسحات ەرجانوۆ.