بيىل ەلىمىزدە 410 اۋىل شارۋاشىلىعى كووپەراتيۆى قۇرىلادى

2017 جىلى رەسپۋبليكا بويىنشا 410 اۋىل شارۋاشىلىعى كووپەراتيۆى قۇرىلادى. بۇل جايىندا بۇگىن قر اۋىل شارۋاشىلىعى ءبىرىنشى ۆيتسە-ءمينيسترى قايرات ايتۋعانوۆ ءمالىم ەتتى, دەپ حابارلايدى قازاقپارات. مينيسترلىكتىڭ كەڭەيتىلگەن القا ماجىلىسىندە نەگىزگى بايانداما جاساعان ونىڭ ايتۋىنشا, وتكەن جىلى ەلباسىنىڭ تاپسىرماسىنا سايكەس شاعىن جانە ورتا شارۋاشىلىقتاردى كووپەراتيۆكە تارتۋ جۇمىستارى قولعا الىنعان. «15 مىڭ جەكە قوسالقى شارۋاشىلىقتى قامتىعان 157 كووپەراتيۆ قۇرىلدى. ولاردىڭ بازاسىندا جۇزدەن استام ءسۇت قابىلدايتىن پۋنكت پەن 7 مىڭ وتباسىلىق بورداقىلاۋ الاڭى ۇيىمداستىرىلدى. تولىقتاي العاندا, ينديكاتيۆتى جوسپارلار بارلىق وبلىستار بويىنشا ورىندالدى», – دەدى ول. ۆيتسە-ءمينيستردىڭ ايتۋىنشا, بيىل جەرگىلىكتى اتقارۋشى ورگاندار 410 كووپەراتيۆ قۇراتىن بولادى. «تولىقتاي العاندا الداعى 5 جىلدا كووپەراتيۆتەر قىزمەتىمەن جارتى ميلليون جەكە قوسالقى شارۋاشىلىق پەن شاعىن شارۋاشىلىقتار قامتىلاتىن بولادى. كووپەراتيۆتەر ونىمدەردى دايىنداۋعا, ساقتاۋعا جانە تاسىمالداۋعا كومەكتەسەدى. بۇعان قوسا, ۆەتەريناريا مال ازىعىن دايىنداۋ, اگروحيميا جانە ءوز مۇشەلەرىنە نەسيە بەرۋدە جاردەمدەسەدى. جالپى كووپەراتيۆتەر اۋىلداردىڭ ودان ارى دامۋىنىڭ نەگىزى بولۋى ءتيىس», – دەدى ايتۋعانوۆ.