6 ناۋرىزدا پارلامەنت پالاتالارىنىڭ بىرلەسكەن وتىرىسى وتەدى

6 ناۋرىزدا پارلامەنت پالاتالارىنىڭ بىرلەسكەن وتىرىسى ءوتىپ, وندا «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» قر زاڭىنىڭ جوباسى ەكىنشى وقىلىمدا قارالادى, دەپ حابارلايدى قازاقپارات. مۇنداي ۇسىنىستى بۇگىن پارلامەنت پالاتالارىنىڭ بىرلەسكەن وتىرىسىندا جوعارى زاڭ شىعارۋشى ورگان پالاتالارىنىڭ بىرلەسكەن كوميسسياسىنىڭ توراعاسى نۇرلان ءابدىروۆ جاسادى. «بىرىنشىدەن, 4 ناۋرىزدا  پارلامەنت  پالاتالارىنىڭ بارلىق تۇراقتى كوميتەتتەرى وزدەرىنىڭ وتىرىستارىن وتكىزۋى ءتيىس بولادى. وندا بۇگىن دەپۋتاتتار تارابىنان زاڭ جوباسىنا قاتىستى ايتىلعان  ۇسىنىستار مەن ەسكەرتۋلەردى تالقىلاپ, بىرلەسكەن كوميسسياعا وزدەرىنىڭ قورىتىندىسىن ەنگىزەدى. ەكىنشىدەن, ەرتەڭ  ساياسي پارتيالاردىڭ فراكتسيالارىندا زاڭ جوباسىن تالقىلاۋدى ۇسىنامىن. ۇشىنشىدەن, كوميتەتتەردىڭ قورىتىندىلارىن, ساياسي پارتيالار فراكتسيالارىنىڭ شەشىمدەرىن, دەپۋتاتتاردىڭ ۇسىنىستارىن 5 ناۋرىز كۇنى ساعات 14.00-گە دەيىن بىرلەسكەن كوميسسياعا جازباشا تۇردە  بەرۋدى ۇسىنامىن», - دەدى  بىرلەسكەن كوميسسيا توراعاسى. ونىڭ اتاپ وتۋىنشە, بىرلەسكەن كوميسسيا پارلامەنت پالاتالارىنىڭ بىرلەسكەن وتىرىسىنا  زاڭ جوباسىنا قاتىستى سالىستىرمالى كەستە ازىرلەيتىن بولادى. «وسىعان بايلانىستى وسى جىلدىڭ 6 ناۋرىزى كۇنى پارلامەنت پالاتالارىنىڭ بىرلەسكەن وتىرىسى اياسىندا زاڭ جوباسىن ەكىنشى وقىلىمعا شىعارۋدى ۇسىنامىن»,-  دەدى ءابدىروۆ. وسى رەتتە ءماجىلىس توراعاسى نۇرلان نىعماتۋلين بۇل زاڭ جوباسى  ەكىنشى وقىلىمعا دەيىن ءماجىلىس پەن سەناتتىڭ تۇراقتى كوميتەتتەرىندە, ساياسي پارتيالاردىڭ فراكتسيالارىندا تالقىلانىپ,  بارلىق ۇسىنىستار بىرلەسكەن كوميسسياعا بەرىلەتىندىگىن اتاپ ءوتتى. «كوميسسيا ولاردى جان-جاقتى تالقىلاپ, ءتيىستى  قۇجاتتار ازىرلەيدى. سودان كەيىن پارلامەنت پالاتالارىنىڭ بىرلەسكەن وتىرىسىندا  قارايتىن  بولامىز. وسىعان بايلانىستى جاڭا عانا كوميسسيا توراعاسى 6 ناۋرىز  كۇنى ساعات 10-دا زاڭ جوباسىن ەكىنشى وقىلىمدا قاراۋ تۋرالى ۇسىنىس جاسادى»,-  دەدى نىعماتۋلين.