قحا ەلدەگى دىنارالىق كەلىسىمدى كونستيتۋتسيامەن قورعاۋدى ۇسىندى

قحا اتىنان پارلامەنت ءماجىلىسىنىڭ دەپۋتاتى ناتاليا جۇمادىلداەۆا ەلىمىزدە دىنارالىق كەلىسىم بويىنشا كونستيتۋتسيالىق قورعاۋدى بەكىتۋدى ۇسىندى, دەپ حابارلايدى قازاقپارات. «ۇلتارالىق جانە كونفەسسياارالىق كەلىسىمدى ساقتاۋ مەن دامىتۋ اتا زاڭنىڭ نەگىزگى ۇستانىمدارىنىڭ ءبىرى بولۋى ءتيىس دەپ سانايمىز. سوندىقتان دا ارىپتەسىم رومان كيمنىڭ كونستيتۋتسيالىق قورعاۋ كەپىلىمەن تەك ۇلتارالىق قانا ەمەس, سونىمەن قاتار كونفەسسياارالىق كەلىسىمدى دە قامتۋ تۋرالى ۇسىنىسىمەن كەلىسەمىن», - دەدى ول پارلامەنت پالاتالارىنىڭ بىرلەسكەن وتىرىسىندا. وسىعان بايلانىستى قازاقستان حالقى اسسامبلەياسى اتىنان سايلانعان دەپۋتاتتار قر كونستيتۋتسياسىنىڭ 39-بابى 2-تارماعىنا «ۇلتارالىق قانا ەمەس, سونىمەن قاتار كونفەسسياارالىق كەلىسىمدى بۇزۋعا قابىلەتتى كەز كەلگەن ءىس-قيمىلداردى كونستيتۋتسيالىق ەمەس دەپ تانۋ» ۇسىنىسىن كوتەردى. «كونستيتۋتسياعا وزگەرىستەر ەنگىزۋ تۋرالى زاڭ جوباسى جالپىعا ورتاق تالقىلاۋدان ءوتىپ, حالىق تاراپىنان قولداۋعا يە بولدى. وڭىرلەرگە ساپارلار بارىسىندا پرەزيدەنتتىڭ كونستيتۋتسيالىق رەفورماسىن قازاقستاندىقتار قولدايتىنىنا كوز جەتكىزدىك. سوندىقتان دا ءبىز بۇل زاڭ جوباسىن تولىقتاي قولدايمىز»,-دەدى ول. ايتا كەتەيىك, پالاتالاردىڭ بىرلەسكەن وتىرىسى بارىسىندا «قازاقستان رەسپۋبليكاسى كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» قر زاڭىنىڭ جوباسى ءبىرىنشى وقىلىمدا تالقىلاندى. قوس پالاتا وتىرىسىندا ەلباسى نۇرسۇلتان نازارباەۆ كونستيتۋتسيالىق رەفورمالاردى ەسكەرە وتىرىپ, ۇكىمەت پەن پارلامەنت قانداي جاعدايدا جۇمىس ىستەيتىندىگىن تۇسىندىرگەن بولاتىن.