نازارباەۆ: 26-باپتى كەيىن قارايمىز

استانادا ءوتىپ جاتقان پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى نۇرسۇلتان نازارباەۆ  كونستيتۋتسيانىڭ 26-بابىنا تۇزەتۋ ەنگىزۋ تۋرالى ايتتى. «ءبىر ماسەلە جونىندەگى جاعدايعا توقتالا كەتۋ كەرەك. جالپىۇلتتىق تالقىلاۋ بارىسىندا جالپى كونستيتۋتسيا بويىنشا ۇسىنىلعان بارلىق جوبالار قولداۋ تاپتى دەپ ايتۋعا بولادى. دەگەنمەن, كونستيتۋتسيانىڭ 26-بابىن قوعامدا كوپشىلىك قولداعانىمەن, پىكىر قايشىلىقتارى دا كورىندى. ءبىزدىڭ ساۋالناما بويىنشا 70 پايىزدان استام ادام ونى قولداپ وتىر. دەگەنمەن, مەنشىك ماسەلەسى جونىندە باسقا پىكىر ايتقان ازاماتتار دا بار. ماسەلە جەر مەنشىگىنە بايلانىستى دەگەن پىكىرلەر بار. ول جونىندە ماسەلەلەر بولعانىن «جەر تۋرالى» زاڭ قابىلدانعان كەزدە بىلەسىزدەر», - دەدى ەلباسى. قازاقستان پرەزيدەنتى كونستيتۋتسيادا جۇرتشىلىق پىكىرى ەسكەرىلۋى, كونسەنسۋس بولۋى تيىستىگىن باسا ايتتى. «وسى قاعديدانى ۇستانا وتىرىپ مەن 26-باپتى وزگەرىسسىز بۇرىنعى رەداكتسيادا قالدىرۋ تۋرالى شەشىم قابىلداپ, سىزدەرگە ۇسىنىپ وتىرمىن. تالقىلاۋ بارىسىندا سىزدەر دە قارايسىزدار دەپ ويلايمىن. ال وزگە ماڭىزدى ماسەلەلەرگە قاتىستى زاڭ جوباسىنىڭ باعىت-باعدارى ايقىن», - دەدى نازارباەۆ. پرەزيدەنت زاڭدى جولمەن يەلەنگەن كەز كەلگەن جەكە مەنشىكتىڭ كونستيتۋتسيامەن قورعالاتىنىنا باسا نازار اۋداردى. ەستەرىڭىزگە سالا كەتەيىك, 1 ناۋرىز كۇنى مەملەكەتتىك بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى جۇمىس توبىنىڭ وتىرىسىندا قازاقستان رەسپۋبليكاسى كونستيتۋتسياسىنىڭ قولدانىستاعى رەداكتسياسىندا مەنشىك قۇقىعىنا قاتىستى 26-باپقا ۇسىنىلعان تۇزەتۋلەر تالقىلاندى. جۇمىس توبى مۇشەلەرى اتالعان نورماعا ۇسىنىلعان وزگەرىستەرگە قاتىستى حالىقتان ءتۇرلى ۇسىنىس تۇسكەنى تۋرالى ايتتى. نۇرسۇلتان نازارباەۆ قازاقستان ازاماتتارىنىڭ پىكىرىن ەسكەرىپ, 26-باپقا وزگەرىس ەنگىزبەۋدى ۇسىندى. "كونستيتۋتسيانىڭ 26-بابىن اركىم ارقالاي ءتۇسىندى. كونستيتۋتسيالىق رەفورما قوعامدى ءبىر پىكىرگە توپتاستىرۋعا باعىتتالعان. سول ءۇشىن مەن 26-باپتى بۇرىنعى رەداكتسيادا قالدىرۋدى ۇسىنامىن. ءبىز تاعى دا حالىققا مەنشىك ماسەلەسىنىڭ تەك جەرمەن شەكتەلمەيتىنىن ءتۇسىندىرۋىمىز كەرەك. اركىمنىڭ ءوزىنىڭ مەنشىگى بار. ول ءۇي, جەر, جىلجىمايتىن جانە جىلجىمالى م ۇلىك. مەنشىك قۇقىعىنا ءبارى كىرەدى. ءبىز "اركىم" دەگەندە "ازامات" دەگەن ۇعىم ساقتالادى. نەگىزى, «قازاقستان ازاماتتارىنىڭ» ورنىنا «اركىم» دەگەن وزگەرىستى ەنگىزۋدى زاڭگەرلەر قاۋىمى تولىعىمەن قولدادى. سەبەبى, سونىڭ ارقاسىندا ەلىمىزگە ينۆەستيتسيانى كوبىرەك تارتۋعا مۇمكىندىك بار. ينۆەستورلاردىڭ سەنىمى دە ارتا تۇسەدى. دەگەنمەن, اسىعىستىق جاساماي-اق قويالىق. ماسەلەنى كەيىن قارايمىز. بىزگە كونسەنسۋس كەرەك. وسىنى كەڭىنەن ءتۇسىندىرۋ قاجەت. ءبارىبىر ءبىز وعان كەلەمىز. جەر ماسەلەسىندە دە ونداي بولادى. ويتكەنى, يەسىز جەر توزادى. ونىڭ قۇنارلىعى جوعالادى. سوندىقتان كۇندەردىڭ كۇنىندە ونى ءتۇسىنۋىمىز كەرەك. «يەسى جوق جەر جەتىم» دەگەن قازاقتىڭ ءسوزى بار. تالاي رەت كورگەنبىز, قۋراي ءوسىپ, جەردىڭ توزىپ كەتكەنىن. بۇل باپتى كەيىنگە شەگەرە تۇرايىق», - دەدى نۇرسۇلتان نازارباەۆ.