قر دەنساۋلىق ساقتاۋ مينيسترلىگى ەلباسى جولداۋىندا قويىلعان مىندەتتەمەلەردى جۇزەگە اسىرۋ ءۇشىن 5 ماڭىزدى باستاما كوتەردى. بۇل تۋرالى دەنساۋلىق ساقتاۋ ءمينيسترى ەلجان ءبىرتانوۆ دەنساۋلىق ساقتاۋ مينيسترلىگىنىڭ القا وتىرىسىندا مالىمدەدى, دەپ جازادى Strategy2050.kz.
«ءبىرىنشى باستاما – دەنساۋلىق ساقتاۋ جۇيەسىن پاتسيەنتتەردىڭ مۇددەسىنە قاراي ينتەگراتسيالاۋ. ينتەگراتسيا پروفيلاكتيكالىق دەڭگەيدەن باستاپ بۇكىل كەزەڭدەردى قامتۋى ءتيىس. مەديتسينانى دامىتۋ, دەنى ساۋ جانە ۇزاق ءومىر ءسۇرۋ جونىندەگى ۇلتتىق باعدارلاما قابىلداۋ جوسپارلانىپ وتىر, سالانى تسيفرلاۋ جانە اقپاراتتاندىرۋ جونىندەگى شارالار جالعاسادى», - دەدى ە.ءبىرتانوۆ.
ە.ءبىرتانوۆ ايتىپ وتكەندەي, ەكىنشى باستاما – ستاندارتتاردى ەكونوميكالىق ارىپتەستىك جانە دامۋ جونىندەگى ۇيىمنىڭ تالاپتارىنا سايكەستەندىرۋ. بۇل شارالار اياسىندا جەكە مەديتسينانى دامىتۋداعى كەدەرگىلەردى جويۋ, مەملەكەتتىك فۋنكتسيالاردىڭ بىرقاتارىن تاۋەلسىز كاسىبي ورتاعا بەرۋ, ءدارى-دارمەك جانە مەديتسينالىق بۇيىمداردىڭ باعاسىن رەتتەۋ جوسپارلانعان.
«قازىرگى جاعدايدا مەملەكەتتىك رەسۋرستاردى راتسيونالدى قولدانۋ ماسەلەسى وتكىر تۇرعاندىقتان, ءۇشىنشى باستاما وسىمەن بايلانىستى. بۇل باعىتتا دەنساۋلىق ساقتاۋ سالاسىنداعى ينفراقۇرىلىمدىق جانە كادرلىق ساياساتتى قايتا قاراۋ قاراستىرىلعان. جەكە جانە شەتەلدىك ينۆەستيتسيالار تارتۋ, جەكە-مەملەكەتتىك ارىپتەستىكتى دامىتۋعا, عىلىم مەن مەديتسينالىق ءبىلىمدى جەتىلدىرۋگە ءمان بەرىلمەك», - دەدى مينيستر.
سالانىڭ جەتىستىگىن قامتاماسىز ەتۋ ءۇشىن ونىڭ قارجىلىق تۇراقتىعىن قامتاماسىز ەتۋ كەرەك. سوندىقتان ءتورتىنشى باستاما رەتىندە قارجىلاندىرۋدىڭ وڭتايلى جۇيەسىن قالىپتاستىرۋ مىندەتى قويىلىپ وتىر.
سونىمەن قاتار:ستاتسيونارلىق كومەكتى پايدالانۋدى ازايتۋ, وزىق مەديتسينالىق ترانسفەرتتەردى ەنگىزۋگە ىنتالاندىرۋ, باستاپقى مەديتسينالىق-سانيتارلىق كومەك بيۋدجەتىن قاجەتتىلىكتەرگە قاراي ءبولۋ, تاريفتەردى نەگىزگى قورلاردى, كاپيتالدىق شىعىنداردى, مەديتسينالىق جانە اقپاراتتىق تەحنولوگيالارعا قىزمەت كورسەتۋگە كەتەتىن شىعىنداردى, قارجىلىق قىزمەتتەردىڭ شىنايى شىعىندارىن ەسەپكە الا وتىرىپ قايتا قاراۋ قاراستىرىلعان.
«بەسىنشى باستاما – پاتسيەنتكە ەسەپ بەرەتىن جانە ترانسپارەنتتى جۇيە قالىپتاستىرۋ. وسىعان بايلانىستى مەديتسينالىق مەكەمەلەرگە شارۋاشىلىق جۇرگىزۋ قۇقىن بەرىپ, كورپوراتيۆتى باسقارۋ ەنگىزۋ, مەديتسينالىق قىزمەت كورسەتۋشىلەرگە كPI ەنگىزۋ, قىزمەت كورسەتۋ ساپاسى مەن تيىمدىلىگىن پاتسيەنتتىڭ مۇددەسىنە باعىتتاۋ جوسپارلانعان. تۇپكى ماقسات – مەديتسينالىق قىزمەتتىڭ حالىققا قولجەتىمدىلىگى مەن ساپاسىن قامتاماسىز ەتۋ بولىپ تابىلادى», - دەدى ە.ءبىرتانوۆ.
