"اتامەكەن" مەملەكەتتىك ساتىپ الۋ جۇيەسىن وزگەرتۋدى ۇسىنادى

ساتىپ الۋلاردى ء"بىر تەرەزەدەن" باسقارۋ ءتيىمدى, دەيدى «اتامەكەن» ۇكپ باسقارما توراعاسىنىڭ ورىنباسارى ەلدوس رامازانوۆ. بۇل تۋرالى palata.kz جازادى. "مەملەكەتتىك سەكتور مەن كۆازيمەملەكەتتىك كومپانيالاردىڭ قولدانىستاعى ساتىپ الۋ جۇيەسىنىڭ كەمشىلىكتەرى بىرنەشە جىل قاتارىنان بيزنەس-قوعامداستىقپەن تالقىلانىپ كەلەدى. ۇزاققا سوزىلعان پىكىر-تالاستارعا مەملەكەت باسشىسى ايقىندىق كىرگىزگەن بولاتىن. «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا ەلباسى نۇرسۇلتان نازارباەۆ: «ۇكىمەتكە مەملەكەتتىك ساتىپ الۋ جۇيەسىن ورتالىقتاندىرىلعان قىزمەت قاعيداتى بويىنشا ەنگىزۋدى تاپسىرامىن. ءبىز ەلدەگى سىبايلاس جەمقورلىق دەڭگەيىن تومەندەتۋ باعىتىندا ەلەۋلى قادامدار جاسادىق. الايدا, باستى نازار كوبىنە سىبايلاس جەمقورلىقتىڭ سالدارلارىمەن كۇرەسۋگە اۋدارىلىپ وتىر. سىبايلاس جەمقورلىقتىڭ سەبەپتەرى مەن العىشارتتارىن انىقتاپ, ولاردى جويۋ جۇمىسىن كۇشەيتۋ قاجەت. كۆازيمەملەكەتتىك سەكتوردا, تابيعي مونوپوليا جانە جەر قويناۋىن پايدالانۋ سالالارىندا دا ساتىپ الۋ شارالارىن وتكىزۋ ادىستەرىن تۇبەگەيلى قايتا قاراستىرۋ كەرەك», – دەپ اتاپ ءوتتى. ونىڭ ايتۋىنشا, ماسەلەنىڭ ءبارى پروتسەدۋرالارداعى ءتارتىپتىڭ جوقتىعىندا جاتىر. "سالاعا جۇيەلى وزگەرىستەر قاجەت. مەملەكەتتىك ساتىپ الۋلارعا ەڭ باستىسى اشىقتىق جەتىسپەيدى. بۇل سۇراقتىڭ شەشىلۋى ينتەرنەتتىڭ نەمەسە باعدارلامالىق قامتاماسىز ەتۋ جۇيەسىنە ەمەس, ادامنىڭ ارەكەتىنە بايلانىستى. بۇگىندە جاسالعان ساتىپ الۋلار بويىنشا قالىپتاسقان باعالارعا ەشكىم مونيتورينگ جاساپ وتىرعان جوق. تۇيىتكىلدىڭ بارلىعى وسى جەردەن تامىر الادى, ماسەلەن ءبىر تاۋار ءتۇرى ءبىر كەزەڭدە ءار ءتۇرلى باعادا ساتىپ الىنادى. تاۋار ءبىر الاڭدا 150 تەڭگەگە ساتىپ الىنسا, ەكىنشى الاڭدا ونىڭ قۇنى 300 تەڭگە بولادى جانە كەرىسىنشە. سوندىقتان ءبىزدىڭ ۇسىنىسىمىز: بارلىق الاڭداردا تۇتىنۋشىعا قولايلى جۇيەنى بىرىزگە ءتۇسىرۋ قاجەت. ءوز الدىنا «اتامەكەن» ۇكپ تاۋەلسىز مونيتورينگ پەن باعا ساراپتاماسىن قۇزىرىنا الاتىن بولادى". ساتىپ الۋلار بويىنشا نەگىزگى ءۇش الاڭ بار, ولاردىڭ وپەراتورلارى قر قارجى مينيسترلىگى جانىنداعى «ەلەكتروندى كوممەرتسيا ورتالىعى» جشس, «سامۇرىق-قازىنا» ۇلتتىق ءال-اۋقات قورى جانىنان قۇرالعان «سامۇرىق-قازىنا كونتراكت» جانە قر ينۆەستيتسيالار جانە دامۋ مينيسترلىگىنىڭ «NADLoG» اكتسيونەرلىك قوعامى, سونداي-اق وزدەرىنىڭ ەلەكتروندى الاڭدارى جوق باسقا دا ۇلتتىق كومپانيالاردىڭ ساتىپ الۋلارىن ايتۋعا بولادى, دەگەن ەلدوس رامازانوۆ وسى ۇيىمداردىڭ ارقايسىسىندا تەندەرلەرگە قاتىسۋ بويىنشا جەتكىزۋشىلەرگە قوياتىن ءوز تالاپتارى بار ەكەنىن ايتتى. "بىراق باستىسى ءار الاڭدا تاۋار, جۇمىس, قىزمەت كورسەتۋدە وزىنە عانا ءتان كودتاۋ جۇيەسى قولدانىلادى. سوندىقتان نارىقتىڭ بارلىق قاتىسۋشىلارىنا ورتاق امبەباپ جىكتەۋ جاساۋ قاجەت. ءبارىمىز ءبىر مەملەكەتتە ءومىر ءسۇرىپ جاتقان جوقپىز با؟ ەندەشە, ماسەلەن, سۋ قۇبىرى NADLoG كودتاۋ جۇيەسىندە باسقاشا, ال ەلەكتروندى كوممەرتسيا ورتالىعى باعدارلاماسىندا باسقاشا باعالانۋى كەرەك؟" "تۇبەگەيلى جاڭا دۇنيەنى جاساۋدىڭ قاجەتى قانشا؟ ءبىز ينتەگراتسيالاۋدى ايتىپ وتىرمىز عوي, سوندىقتان قولدانىستاعى الاڭداردىڭ تاجىريبەسى نەگىزىندە بىرىڭعاي جۇيەنى قالىپتاستىرۋ كەرەك. «سامۇرىق-قازىنا كونتراكت» ۇيىمىندا تاۋارلاردىڭ, جۇمىستاردىڭ جانە قىزمەتتەردىڭ بىرىڭعاي نومەنكلاتۋرالىق انىقتامالىعى (تجق بنا) بار. كاسىپكەرلەردىڭ ايتۋىنشا, اتالمىش كودتار انىقتامالىعى بارلىعىنا تۇسىنىكتى. قايتا ۆەلوسيپەد ويلاپ تابۋدىڭ قاجەتى قانشا؟ ەكىنشى ماسەلە: الدىن الا ىرىكتەۋ كەزەڭىندە ورىن الىپ وتىر. ىرىكتەۋدىڭ تاسىلدەرىن وزگەرتپەي جانە پروتسەدۋراداعى اشىقتىقتى قامتاماسىز ەتپەي, ساتىپ الۋ سالاسىنداعى ماسەلەلەردەن قۇتىلا المايمىز. الدىن الا ىرىكتەۋدەن ءوتۋدىڭ بيزنەس باعىتى مەن ساتىپ الۋدىڭ كۇردەلىلىگىن ەسەپكە الا وتىرىپ, بىرىڭعاي جۇيە جاسالۋ كەرەك. كاسىپكەر بۇل پروتسەدۋرادان ءبىر رەت قانا ءوتىپ, ال ونىڭ دەرەكتەرى اۆتوماتتى تۇردە بارلىق الاڭدارمەن قابىلدانۋى قاجەت. ەگەر كاسىپكەر باسقا الاڭداعى تەندەرگە قاتىسقىسى كەلسە, ول ەكىنشى رەت قاتىسۋ ءۇشىن ەلەكتروندى فورمالاردى قايتادان تولتىرمايدى. ساتىپ الۋ الاڭىندا دەرەكتەردى ءبىر رەت تىركەۋ جەتكىلىكتى بولادى. ايتالىق, كاسىپكەر جيھاز شىعارۋمەن اينالىسادى دەلىك, ەگەر بيزنەستىڭ باسقا سالاسىنا اۋىسىپ كەتپەسە, جۇيە دەرەكتەردى جادىندا ساقتاپ, كاسىپكەردى «جاتىرقاماي» قاتىسۋعا وتكىزەدى", - دەدى. "مۇندا ساتىپ الۋعا قاتىسۋشىلاردىڭ بىرىڭعاي رەەسترى قاجەت. بىزدەگى تاجىريبە قانداي؟ كاسىپكەر ءار الاڭعا قاراي ىڭعايلانۋى كەرەك. ويتكەنى ارقايسىسىنىڭ ساتىپ الۋعا قاتىسۋ ءۇشىن ءوزىنىڭ تالاپتارى مەن ەرەكشەلىكتەرى بار. بۇل ماسەلە تاۋەلسىز ساراپشىلاردىڭ دەربەس مونيتورينگ جاساۋلارى ءۇشىن كەدەرگى كەلتىرەدى. ەندى الدىن الا ىرىكتەۋگە كەلسەك, وسى سالادا «اتامەكەن» ۇكپ قولداۋىمەن الەۋەتتى جەتكىزۋشىلەرمەن ءوزارا جاقسى بايلانىس جاساپ جۇرگەن «سامۇرىق-قازىنا كونتراكت» پەن قر قارجى مينيسترلىگىن ايتۋعا بولادى. الايدا «سامۇرىق-قازىنامەن» جاسالعان الدىن الا ىرىكتەۋ ساتىپ الۋداعى ىرىكتەۋگە سايكەس كەلمەيدى. ياعني, ساتىپ الۋداعى ىرىكتەۋدە جۇيەلىلىك جوق. ال كەز كەلگەن الدىن الا ىرىكتەۋدىڭ ماقساتى – بىلىكتىلىگى جوعارى ءارى جاۋاپكەرشىلىگى مول جەتكىزۋشىلەر پۋلىن قالىپتاستىرۋ. ءبىزدىڭ ۇسىنىسىمىز – ساتىپ الۋدىڭ كۇردەلىلىگى مەن بيزنەس قىزمەتىنىڭ سالالىق باعىتىن ەسكەرە وتىرىپ بىرىڭعاي الدىن الا ىرىكتەۋ جۇيەسىن ەنگىزۋ. ىرىكتەۋ جۇيەسى وتاندىق تاۋار وندىرۋشىلەرىدىڭ بىرىڭعاي جۇيەسىن قوساتىن تاۋار, جۇمىس, قىزمەت كورسەتۋدى جەتكىزۋشىلەردىڭ بىرىڭعاي رەەسترى نەگىزىندە قۇرىلۋى قاجەت. ال رەەستر يندۋستريالىق سەرتيفيكاتتار نەگىزىندە جاسالۋى ءجون. سوڭعىسىن ءوز مىندەتىنە «اتامەكەن» ۇكپ الۋعا دايىن", - دەدى. ونىڭ ايتۋىنشا, ساتىپ الۋ جۇيەسى زەرتتەۋلەر مەن ساراپتاما جۇرگىزۋ ءۇشىن اشىق بولادى. وتاندىق تاۋار وندىرۋشىلەردىڭ رەەسترىن جاساي وتىرىپ, وتاندىق كاسىپورىنداردىڭ باسەكەلەستىك ارتىقشىلىقتارىن باعالاۋ مۇمكىندىگىنە يە بولامىز, ال وسى نەگىزدە يمپورتتى الماستىرۋ تۋرالى ايتۋعا بولادى. يندۋاستريالدى سەرتيفيكات ناعىز وندىرۋشىلەر مەن ولارعا ەلىكتەۋشى وندىرۋشىلەر اراسىنداعى ارا-جىكتى, ياعني دەلدالدار مەن ديلەرلەردەن اجىراتۋعا مۇمكىندىك بەرەدى. مىنە سول كەزدە عانا ساتىپ الۋلار مەن ۇزاقمەرزىمدى كەلىسىمشارتتار ارقىلى  وتاندىق بيزنەسكە كومەك بەرۋ تۋرالى سالالاپ ايتۋعا بولادى. ساتىپ الۋلارداعى ءىت-پلاتفورماسى تۇتىنۋشىلارىنا جاعداي جاساۋىنا كەلەر بولساق, بۇل جەردە ماڭىزدى ەكى ماسەلە بار. بىرىنشىدەن, ساۋدا-ساتتىققا قاتىسۋشى الەۋەتتى كاسىپكەرلەرگە بىرىڭعاي قولجەتىمدىلىك نۇكتەسى قاجەت. الاڭدار ءتۇرلى بولا بەرسىن, جەمە-جەمگە كەلگەندە بارلىق ساۋدا الاڭدارىن بىرىكتىرۋ تەك قانا تەحنيكالىق سۇراق, الايدا قولجەتىمدىلىك نۇكتەسى بىرەۋ عانا بولۋ كەرەك! كاسىپكەردىڭ قولىندا تەك ءبىر قۇپيا ءسوز بولۋى شارت. ونىڭ راسىمدەۋ دەرەكتەرىن سايكەستەندىرۋ جۇيەسى دە ءبىر ىزگە تۇسكەنى ءجون. ەكىنشىدەن, باعانىڭ دەربەس ءارى جاريا مونيتورينگى جاساۋ قاجەت. بۇل مىندەتتى بيزنەس-قوعامداستىعىن شوعىرلاندىرۋشى ۇيىم رەتىندە «اتامەكەن» ۇكپ-عا تاپسىرۋ ورىندى. وسىلاي عانا ءبىز تەندەرلەر وتكىزۋ ۇدەرىسىنىڭ وزىنە تىكەلەي قاتىسپاي-اق, ولاردىڭ اشىق جۇرگىزىلۋىنىڭ ونلاين-باقىلاۋىنا مۇمكىندىك الامىز. مەحانيزمنىڭ ءوزىن وزگەرتپەي, فورماسىن اۋىستىرۋدىڭ ءمانى جوق.