جۇكتى ايەلدەر جۇگىنەتىن قوسىمشا

ەلەكتروندى قىزمەتتى دامىتۋ – بۇل الەمدەگى مەديتسينالىق قىزمەت كورسەتۋدىڭ جاڭا دەڭگەيى. بۇگىندە «دەنساۋلىق» مەملەكەتتىك باعدارلاماسىنا سايكەس, ەلدىڭ مەديتسينالىق سەرۆيسىنە يننوۆاتسيالار ەنگىزۋ زامان تالابىنا ساي جاڭا كەزەڭگە كوتەرىلگەن. وسىعان بايلانىستى بيىل وڭىردە «ۆيەننا» جشس كومپانياسى مەن وبلىستىق دەنساۋلىق ساقتاۋ باسقارماسى «SOS قىزمەتىمەن ديستانتسيالى بوسانۋعا دەيىنگى پاتروناج» بىرلەسكەن جوباسىن ىسكە قوسقان بولاتىن. دەنساۋلىق ساقتاۋ باسقارماسىنىڭ باسشىسى ەرجان نۇرلىباەۆ مالىمدەگەندەي, اتالعان جوبا «دەنساۋلىق» باعدارلاماسىنىڭ تالاپتارىنا تولىق جاۋاپ بەرەدى جانە جۇكتىلىك كەزىندەگى انا مەن بالا ولىمىنە توسقاۋىل بولماق. «بۇگىندە بۇل قوسىمشانى 700-دەن استام جۇكتى انالار پايدالانىپ وتىر. قاراعاندى وبلىسى نارەستەلەردىڭ شەتىنەۋى بويىنشا 7-ورىن جانە 1000 نارەستەگە شاققانداعى انا ءولىمى بويىنشا 5-ورىن الادى. «SOS قىزمەتىمەن ديستانتسيالى بوسانۋعا دەيىنگى پاتروناج» وسى كورسەتكىشتەردى جۇكتىلىك كەزىندە دە, بالا تۋعاننان كەيىن دە 42 كۇن بويى جاقسارتۋعا باعىتتالعان. باعدارلامانى كەز كەلگەن اياعى اۋىر انا ۇيالى تەلەفونىنا تەگىن جۇكتەي الادى. وندا الدىن الۋ شارالارىنا بايلانىستى تولىق اقپارات, پاتسيەنت پەن دارىگەردىڭ ىنتىماقتاستىعىن جاقسارتۋ, جەدەل جاردەم قىزمەتىنىڭ ساپاسىن ارتتىرۋ كوزدەلگەن», دەيدى قاراعاندى قالاسىنداعى №4 ەمحانانىڭ ديرەكتورى سالتانات شايداروۆا. جۇكتى ايەلدىڭ جاعدايىن باقىلاۋ, ناقتى تۇرعىلىقتى جەرىن ءبىلۋ, جەدەل كومەك كورسەتۋ سمارتفون نەمەسە پلانشەتكە ءموبيلدى قوسىمشا ورناتۋ ارقىلى جۇزەگە اسپاق. قوسىمشادا دارىگەرگە ارنالعان ۆيرتۋالدى جۇمىس كابينەتى جاساقتالعان. وندا دارىگەر قارالۋشىنىڭ بارلىق دەرەكتەرىن كورە الاتىن بولادى. جالپى, وبلىستىق دەنساۋلىق ساقتاۋ باسقارماسىنىڭ دەرەكتەرىنە سۇيەنسەك, جىل سايىن وڭىردە 22 مىڭ 500 بالا دۇنيەگە كەلەدى. نارەستە ءولىمى 6,9 پايىزعا تومەندەگەن. بۇل كورسەتكىشتەر اتالعان قوسىمشا ارقىلى تاعى دا جاقسارا تۇسەدى دەگەن سەنىم بار. ميراس اسان, «ەگەمەن قازاقستان» قاراعاندى