ۇلتتىق مۋزەيدە ەلباسى جولداۋى تالقىلاندى

بۇگىن ۇلتتىق مۋزەيدە «ەلباسى جولداۋى: قازاقستاننىڭ جاڭا دامۋ باعدارى» اتتى دوڭگەلەك ۇستەل ءوتتى. دوڭگەلەك ۇستەلدە قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ 2017 جىلعى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋىنىڭ باسىم باعىتتارى تالقىلانىپ, كوپشىلىككە جەتكىزۋ ماقساتتارى جونىندە ءسوز قوزعالدى. جولداۋدىڭ مادەنيەت سالاسىنا قاتىستى تۇستارى باسا نازاردا ۇستالىپ, ۇلتتىق مۋزەيدەگى جاڭا تەحنولوگيالاردىڭ قاجەتتىلىكتەرى مەن تيىمدىلىكتەرى قىزۋ تالقىعا ءتۇستى. «بۇل وزگەرىس, بۇل جاڭعىرۋ ءبىزدىڭ مەملەكەتىمىزدىڭ الدىنداعى جاڭا بەلەس جانە تاۋەلسىز مەملەكەتىمىزدىڭ الدىنا قويىلعان زامان تالابى دەسەك تە بولادى. بۇل جولداۋدى ءبىز جاي عانا دوڭگەلەك ۇستەلدەردە تالقىلاپ قويماي, تالاپتار مەن مىندەتتەردى ورىنداۋعا تالپىنۋىمىز كەرەك», – دەدى قر ۇلتتىق مۋزەيى ديرەكتورىنىڭ عىلىمي جۇمىستارى جونىندەگى ورىنباسارى جاكەن تايماعامبەتوۆ. ال «حالىق قازىناسى» عىلىمي-زەرتتەۋ ينستيتۋتىنىڭ باسشىسى اقان وڭعار: «مەن وسى جولداۋداعى ادام فاكتورى, ياعني, ادام كاپيتالى دەگەن تۇسقا توقتالعىم كەلىپ وتىر. الەمنىڭ الدىڭعى قاتارلى ەلدەرىنىڭ كوپشىلىگىندە وسى ماسەلەگە باسا نازار اۋدارىلادى. ياعني, ءبىلىمدى ازاماتتار, ساپالى ماماندار دايىنداۋ. وسى ورايدا ءبىز دە ۇلتتىق قاسيەتتەرىمىزدى دامىتا وتىرىپ, حالقىمىزدىڭ ساپاسىن ارتتىرۋىمىز كەرەك. جانە بۇل مەملەكەتتىڭ باعدارلاماسى بولعانىمەن, ساپالى مامان بولىپ قالىپتاسۋ ءوزىمىزدىڭ قولىمىزدا. مەملەكەت بىزگە ءۇمىت ارتادى», – دەپ جاس مامانداردىڭ الدىنا ۇلكەن ماقساتتار قويدى.