گولوۆكيننىڭ 19 جاسىنداعى ۆيدەوسى جاريالاندى

الەۋمەتتىك جەلىلەردە كاسىپقوي بوكسشى گەننادي گولوۆكيننىڭ جاس كۇنىندەگى ۆيدەوسى جاريالاندى. ۆيدەو 2001 جىلى ماۋسىم ايىندا بوكسشىنىڭ 19 جاسىندا تۇسىرىلگەن. بۇل ونىڭ اۋەسقوي بوكستا قازاقستاندىق جاتتىقتىرۋشى عالىم كەنجەباەۆپەن دايىندالىپ جۇرگەن كەزى. Vesti.kz مالىمەتى بويىنشا GGG اۋەسقوي رينگتە سەگىزىنشى جىل جاتتىعىپ جۇرگەن شاق. 2000 جىلى جاستار اراسىندا جارتىلاي ورتا سالماقتا الەم چەمپيونى اتانسا, 2001 جىلى شىعىسازيالىق ويىندارىندا توپ جارعان. اقتىق سىندا قازىرگى كاسىپقوي بوكسشى دەنيەل گيلدى جەڭگەن بولاتىن. بۇل ۆيدەو تۇسىرىلگەننەن كەيىن بەس جىلدان سوڭ گولوۆكين كاسىپقوي بوكسقا اۋىستى. بۇگىندە ورتا سالماقتا WBA (Super), IBO, WBC جانە IBF بەلبەۋلەرىنىڭ يەگەرى, شارشى الاڭدا 36 جەكپە-جەك وتكىزىپ, ءبارىن دە جەڭىسپەن (33 نوكاۋت) اياقتاعان. كەلەسى ايقاسىن 18 ناۋرىز كۇنى اقش-تىڭ نيۋ-يورك قالاسىنداعى Madison Square Garden ارەناسىندا امەريكالىق دەننيەل دجەيكوبسقا قارسى وتكىزەدى.