ەو-نىڭ ۇلىبريتانياسىز دامۋىنىڭ بەس ستسەناريى

ەۋروپارلامەنتتە ءسوز العان ەۋروكوميسسيا باسشىسى جان-كلود يۋنكەر ۇلىبريتانيانىڭ ەۋروپا وداعىنان شىققان كەيىنگى وداق ەلدەرىنىڭ دامۋى بەس ءتۇرلى ستسەناريمەن ءوربۋى مۇمكىن ەكەنىن ايتتى, دەپ جازادى newsru.com. ءبىرىنشى ستسەناري بويىنشا, "قازىرگى كۋرس ساقتالماق". ەو-دا قالاتىن 27 ەل باياعىشا بىرلەسىپ جۇمىس ىستەي بەرمەك. الايدا, يۋنكەردىڭ ايتۋىنشا, كوشى-قون داعدارىسىنىڭ كەسىرىنەن وداقتا الاۋىزدىق تۋىنداپ, مەملەكەتتەردىڭ بىرلىگى بۇزىلۋى مۇمكىن. ەكىنشى مۇمكىن ستسەناريدە ەو باسشىسى ينتەگراتسيالىق ساياسي ماسەلەلەردى ىسىرىپ قويىپ, الدىمەن وداقتىڭ ىشكى نارىعىن دامىتۋعا كۇش سالۋعا شاقىرادى. الايدا, "بىرلەسكەن ساۋدا جاساۋ ءۇشىن رەسۋر تاپشىلىعى بار", دەيدى يۋنكەر. ءۇشىنشى ستسەناريدە ءار ەل وزىنشە دامۋ قارقىنىن الماق. اركىم ءوزىنىڭ شاماسىن ماكسيمالدى پايدالانباق. بۇل جاعدايدا ەو ەلدەرىنىڭ ىشىندە مەملەكەتتەر بىرنەشە توپقا جىكتەلىپ كەتۋى مۇمكىن ەكەنى ايتىلعان. ولاي بولعان جاعدايدا, وداقتىڭ بولاشاعى ب ۇلىڭعىر ەكەنىن ايتادى يۋنكەر. ال ءتورتىنشى ستسەناريدىڭ ەرەكشەلىگى سالالاردى ءبولىپ الۋعا كەلىپ تىرەلەدى. ول كەزدە "از شىعىن, جوعارى تيىمدىلىك" پرينتسيپىمەن جۇمىس ىستەمەك. ءار مەملەكەت ءوزىنىڭ باسىم سالالارىن ءبولىپ العاندا قورعانىس پەن شەكارا ماسەلەسى زارداپ شەگۋى مۇمكىن ەكەنى جوققا شىعارىلمايدى. بەسىنشى ستسەناريدە "ەۋرووداققا جاقسى نارسەنىڭ ءبارى بارلىق مەملەكەت ءۇشىن جاقسى" دەگەن ۇران اياسىندا ءوربۋى مۇمكىن. ياعني, ەو ەلدەرى تىزە قوسا وتىرىپ وداقتىڭ قۋاتىن الەم بويىنشا ارتتىرۋعا كۇش سالماق. "دەگەنمەن, مۇنداي جاعدايدا وداققا سەنىمسىزدىكپەن قارايتىن مەملەكەتتەردىڭ كەرى رەاكتسياسى پايدا بولىپ, ۇلتتىق بيلىكتىڭ السىرەۋى تۋرالى پىكىرلەر قىلاڭ بەرۋى مۇمكىن", دەپ توپشىلايدى ەو باسشىسى.