ستويلوۆ: «قايراتتى» جەڭۋ ءۇشىن بارىمىزدى سالامىز

"استانا" فۋتبول كومانداسى ءوز الاڭىندا دايىندىق جۇمىستارىن باستاپ كەتتى. ەكى كۇننەن كەيىن, ياعني 4 ناۋرىز كۇنى ماۋسىمدى الماتىنىڭ "قايراتىنا" قارسى قازاقستان سۋپەركۋبوگى ءۇشىن بولاتىن ويىنمەن اشادى. وقۋ-جاتتىعۋ جيىندارى, جاس ويىنشىلاردىڭ جۇمىستارى جانە "قايراتقا" قارسى ويىندا فۋتبولشىلاردىڭ جەڭىسكە دەگەن سەنىمدىلىگى جونىندە باس باپكەر ستانيمير ستويلوۆ اڭگىمەلەپ بەردى. بۇل تۋرالى fca.kz حابارلادى. «وقۋ-جاتتىعۋ جيىندارىن جوعارى دەڭگەيدە وتكىزدىك. ءبىز ءۇشىن جاعدايدىڭ ءبارى جاسالدى. فۋتبولشىلاردىڭ دايىندىق جۇمىستارى الداعى ماۋسىمدا جەتىستىكتەرگە جەتكىزەدى دەپ سەنەمىن. جولداستىق كەزدەسۋلەردەگى جەڭىس نەمەسە جەڭىلىس ەشنارسەگە سەبەپ بولادى دەپ ويلامايمىن. باستى ماسەلە كلۋبتىڭ ماۋسىمعا قانداي دايىندىقپەن كەلۋى جانە قالاي باستاۋىندا بولماق. وتكەن ويىنداردا ءبىز قورعانىستا جاقسى ويناي الدىق, بىراق شابۋىل شەبىندەگى قيىندىقتارىمىزدى شەشۋىمىز قاجەت. جالپى, مەن ويىنشىلاردى قورعاۋشىلار جانە شابۋىلشىلار دەپ ءبولىپ جاتپايمىن, كوماندا الدا دا, ارتتا دا جاقسى ويناۋى ءتيىس», – دەدى ستويلوۆ. وقۋ-جاتتىعۋ جيىندارىندا نەگىزگى قۇراممەن جاستاردىڭ دا اتتانعانى بەلگىلى. «ۇلكەن فۋتبولعا جاڭادان قادام باسىپ كەلە جاتقاندىقتان, كوپ ەڭبەكتەنۋ كەرەك. جوعارى دەڭگەيدەگى تاجىريبەسى جوق, دەگەنمەن سوعان ۇقساپ باعۋدا. ءدال وسى قارقىندا جالعاستىرار بولسا, ءبىر-ەكى جىلدا «استاناعا» تالانتتى ويىنشىلار كەلۋى مۇمكىن. ال ەگەر جۇلدىزدىق اۋرۋعا شالدىعار بولسا, بولاشاعىنا كەرى اسەرىن تيگىزىپ الادى. قازىر بارلىعى ءوز قولىندا. ولاردى مۇمكىندىگىنشە قولدايمىز, جەتىستىكتەرگە يتەرمەلەيمىز, «استانا» مەنتاليتەتىن سىڭدىرەمىز», – دەدى ول. كومانداعا جاڭادان بىرنەشە ويىنشىلار كەلدى. «جاتتىعۋ كەزىندە بارىن سالىپ جۇرگەندەرىن كوردىم, ماعان دا كەرەگى سول. جاڭا فۋتبولشىلاردىڭ دەڭگەيى رەسمي ويىنداردان كەيىن بەلگىلى بولادى. ءبىز ولاردى «استانا» كومانداسىنىڭ ءالسىز تۇستارىن تولىقتىرا الادى دەگەن ويمەن الدىق», – دەدى «استانانىڭ» باس باپكەرى. 4 ناۋرىز كۇنى الماتى قالاسىنداعى ورتالىق ستاديوندا ەل سۋپەركۋبوگى ساراپقا سالىنادى. «قايراتقا» قارسى ويىندا فۋتبولشىلار ىلعي دا جەڭىسكە جەتۋ ءۇشىن ايانىپ قالمايدى. ول جاعىنا ءوز باسىم تولىعىمەن سەنىمدىمىن. قازاقستانداعى ەڭ مىقتى قوس كوماندا كەزەكتى رەت سىنعا تۇسپەك. ءبىزدى الماتىدا تارتىستى ويىن كۇتىپ تۇر», – دەدى ول. «جانكۇيەرلەر كوماندانىڭ ون ەكىنشى ويىنشىسى» دەگەن ۇعىم بار. «ولار ءبىزدى وتكەن جىلعىداي قولدايدى دەپ ويلايمىن. ال ءبىز ءوز كەزەگىمىزدە جانكۇيەرلەرىمىزدى قۋانتۋ ءۇشىن بار كۇشىمىزدى سالاتىن بولامىز», – دەپ قورىتىندىلادى ول.