الەكساندر بوروديۋك: كوماندانىڭ جەڭىسكە دەگەن سەنىمدىلىگىن ارتتىرعىم كەلەدى

بىرەر كۇن بۇرىن عانا فۋتبولدان قازاقستان ۇلتتىق قۇراماسىنىڭ جاتتىقتىرۋشىسى بولىپ تاعايىندالعان الەكساندر بوروديۋك «سپورت-ەكسپرەسس» باسىلىمىنا سۇحبات بەردى. جاڭا باپكەر الداعى جوسپارى جايلى, ۇجىمعا قانداي وزگەرىس ەنگىزگىسى كەلەتىنىن مالىمدەدى. «كوماندانىڭ الەم چەمپيوناتىنىڭ ىرىكتەۋ كەزەڭىندە وتكىزگەن ويىندارىنىڭ ءبارىن كوردىم. بايقاعانىم, پسيحولوگيالىق تۇرعىدان سەنىمدىلىك جەتىسپەيدى. جىگىتتەردىڭ بويىنداعى سەنىمدىلىكتەرىن وياتىپ, جەڭىسكە دەگەن قۇلشىنىستارىن ارتتىرعىم كەلەدى. بۇل ولاردىڭ قولىنان كەلەدى», – دەدى الەكساندر بوروديۋك. «تەحنيكالىق تۇرعىدان ويىنشىلاردىڭ ءبارى جاقسى دەڭگەيدە. تەك ازداپ كوزقاراستارىن وزگەرتۋ كەرەك. الاڭعا قوس كوماندا 11 فۋتبولشىسىن شىعارادى. فيزيكالىق جانە پسيحولوگيالىق تۇرعىدان كىم مىقتى بولسا, سول ۇجىم جەڭىسكە جەتەدى. مىسالعا بىرەر اي بۇرىن قازاقستان جاستارى گراناتكين تۋرنيرىندە ەكىنشى ورىن العانىن ايتۋعا بولادى», – دەدى ول. «ەۋروپادا ماتچتار كەشكە تامان باستالسا, قازاقستاندا ءتۇننىڭ ءبىر ۋاعى بولادى. ونىڭ ۇستىنە الىس ەلدەرگە جول جۇرەتىن كەزدەر بولادى. مىنە, وسىنىڭ ءبارىن الدىن الا جوسپارمەن ورىنداۋ كەرەك», – دەدى ۇلتتىق قۇرامانىڭ باس باپكەرى. «قازاقستاننىڭ ازيا كونفەدەراتسياسىنا كوشۋى كەرەك پە؟» دەگەن سۇراققا: «ەشقاشان ارتقا قادام جاساۋعا بولمايدى. ەۋروپانىڭ ۇزدىكتەرىمەن كۇش سىناسىپ, دامۋ كەرەك. ول ءۇشىن جاعدايدىڭ ءبارى جاسالعان. الماتىعا جاقىن جەردە ارنايى بازاسى بار. ال ەۋروكۋبوكتارعا قاتىسۋ ارقىلى قازاقستان چەمپيوناتى كۇشەيە تۇسەدى», – دەدى ول.