قازاق ەلىنىڭ قارىمىن قۋاتتايدى

قازاقستاننىڭ بۇۇ مۇشەلىگىنە وتكەنىنە 25 جىل تولۋىنا وراي ءال-فارابي اتىنداعى قازاق ۇلتتىق ۋنيۆەرسيتەتىندە سالتاناتتى جيىن ءوتتى. وعان سىرتقى ىستەر مينيسترلىگىنىڭ, بۇۇ قوعامدىق اقپارات دەپارتامەنتىنىڭ, قالالىق اكىمدىكتىڭ, ديپلوماتيالىق وكىلدىكتەر مەن حالىقارالىق ۇيىمدار وكىلدەرى جانە الماتى قالاسىنىڭ جوعارى وقۋ ورىندارىنىڭ وقىتۋشىلارى مەن ستۋدەنتتەرى قاتىستى. قازۇۋ پرورەكتورى مۇ­حام­بەتقالي بۇركىتباەۆ «ۋني­ۆەرسيتەتىمىز بۇگىندە بۇۇ ءبىلىم جانە عىلىم سالاسىنىڭ بار­لىق قۇرىلىمىنداعى ءبولىم­دەرىمەن تىعىز بايلانىس جاساپ كەلەدى. قازىرگى ۋاقىتتا ءبىزدىڭ وقۋ ورنى «اكادەميالىق ىقپال» باعدارلاماسىنىڭ تۇ­راقتى دامۋى ءۇشىن جۇمىس ءىس­تەيتىن جاھاندىق حابقا اينالدى. سونىمەن قاتار, بۇگىندە قازۇۋ-دا ەكى يۋنەسكو كافەدرا­سى قىز­مەت اتقارىپ جاتىر. ونىڭ ءبىرى بۇقارامەن قاتىناس ورناتۋ سالالارى بويىنشا جۋرناليس­تيكا فاكۋلتەتىندە بولسا, ەكىنشىسى گەوگرافيا جانە تابيعاتتى پايدالانۋ فا­كۋل­تەتىندەگى تۇراقتى دامۋ ءجو­نىندەگى يۋنەسكو كافەدراسى», دەدى. سىرتقى ىستەر مينيسترلىگىنىڭ ايرىقشا ەلشىسى ماينۇر مۇر­زاماديەۆا ءوز بايانداماسىندا ەلىمىزدىڭ جوعارى ساياسي دەڭگەيى مەن حالىقارالىق دارەجەسىنە توقتالدى. «ەل تاۋەلسىزدىگىنىڭ 25 جىلى – قازاق­ستاننىڭ بۇۇ-مەن يگىلىكتى ىنتىماقتاستىعىنىڭ 25 جىلىمەن قاتار كەلدى. قازاق­ستاننىڭ بۇۇ قاۋىپسىزدىك كەڭە­سىنە تۇراقتى ەمەس مۇشە بولىپ ەنۋى دە مەملەكەت ءۇشىن اسا ماڭىزدى تاريحي جەتىس­تىكتەردىڭ ءبىرى بولىپ تابىلادى. بۇۇ دامۋ باعدارلاماسى ەكسپو-2017 حالىقارالىق كورمەسىنە قاتىساتىنىن رەسمي مالىمدەپ, بۇۇ باستاماسىمەن «جاسىل» تەحنولوگيالار مەن ينۆەستيتسيالىق جوبالاردى دامىتۋ جونىندەگى حالىقارالىق ورتالىق اشۋعا دايىن ەكەندىگىن جەتكىزدى», دەدى ول. قازاقستاننىڭ الەمدىك ۇي­ىمعا العاشقى قادامدارى تاريح قويناۋىنداعى قۇجاتتار مەن ەستەلىك سۋرەتتەر ارقىلى كورسەتىلگەن سالتاناتتى جيىندا ءسوز العان قازاقستاننىڭ بۇۇ جانىنداعى تۇڭعىش تۇ­راق­تى وكىلى, Cىرتقى ىستەر مي­نيسترلىگىنىڭ ايرىقشا تاپسىرمالار جونىندەگى ەلشىسى اق­مارال ارىستانبەكوۆا قازاق­ستان مەن اتالمىش ۇيىم­نىڭ 25 جىلدىق حرونولوگياسىنا شولۋ جاساي وتىرىپ, «ەلىمىز 25 جىل ىشىندە حالىقارالىق قاتىناستار سالاسىندا ۇلكەن جولدان ءوتىپ, بۇۇ-نىڭ بەدەل­دى مۇشەسىنە اينالدى. اتال­عان ۇيىممەن يگىلىكتى ىنتى­ماقتاستىق اياسىندا قازاق­ستان حالىقارالىق ارەنادا لايىقتى ورىنعا يە», دەدى. ەلشى قازاقستاننىڭ عالامدىق يادرولىق قارۋسىزداندىرۋعا قوسقان ۇلەسىن ەرەكشە ايتا كەلىپ, قازاقستاننىڭ بۇۇ-عا كىر­گەنىنە 25 جىل تولۋىنا ار­نالعان كىتابىن تانىستىردى. مەرەكەلىك شارا بارىسىندا قحر, اقش, تاجىكستان, قىرعىزستان, ازەربايجان ەلدەرىنىڭ جانە رەسەي فەدەرا­تسياسىنىڭ ەلىمىزدەگى باس كونسۋلدارى ءسوز سويلەپ, قازاق ەلىنە دەگەن جۇرەكجاردى نيەت-تىلەكتەرىن ءبىلدىردى. باياندا­ماسىن قازاقشا باستاعان اقش-تىڭ باس كونسۋلى مارك مۋديدىڭ ايتۋىنشا, قازاقستان مەن اقش حالىقتارىنىڭ ۇقساس تۇسى – وزدەرىنە دەگەن سەنىمدىلىگى جانە الدارىنا قويعان ماق­ساتتارىنا قايتسە دە جەتۋگە تىرىساتىن ەڭبەكقورلىعى. «قازاقستان 25 جىلدىڭ ىشىندە كوپتەگەن جەتىس­تىكتەرگە جەتتى. ءبىر باي­قاعانىم, قازاقستان ديپلوماتتارى ءوز ەلىن, تاريحى مەن مادەنيەتىن, ادەبيەتى مەن ۇلت­تىق قۇندىلىقتارىن جوعارى دارە­جەدە كورسەتە بىلە­دى», – دەدى مۋدي مىرزا. ال بۇۇ تۇراقتى ۇيلەس­تىرۋشىسى, قازاقستانداعى بۇۇ دامۋ باعدارلاماسىنىڭ وكىلى نو­ريماس شيمومۋرا ءوزى جولداعان ارنايى حاتىندا: «قا­زاقستاننىڭ تۇراقتىلىق پەن بەيبىتشىلىكتى ساقتاپ, قاۋىپ­سىزدىكتى قامتاماسىز ەتۋىنىڭ ار­قاسىندا ورتالىق ازيادا يادرو­لىق قارۋدان ازات ايماق قۇرۋ مۇمكىندىگى تۋدى», دەي كەلە قازاقستاننىڭ تۇراقتى دامۋ سالاسىندا كوشباسشىلىق تانىتىپ, ايماقتىق جانە جاھاندىق قاۋىپ­سىزدىكتى قامتاماسىز ەتۋ­دەگى جۇيەلى جۇمىسىن ەرەكشە باعالاعان. وسى تۇستا ايتىپ وتەر جايت, قازاقستان باستاماسىمەن بۇۇ باس اسسامبلەياسىنىڭ وتكەن سەسسياسىنىڭ قارارى 2013-2022 جىلداردى مادەنيەتتەر جاقىنداسۋىنىڭ حالىقارالىق ون جىلدىعى دەپ جاريالاپ, ونىڭ رەسمي ۇلىقتاۋ ءراسىمىن استانادا وتكىزگەن ەدى. بۇگىندە قازاقستان كۇن تارتىبىندەگى الەمدىك وزەكتى ماسەلەلەردى قاراستىرىپ, ولار­دىڭ شەشىمىن تابۋدا ءوزىنىڭ ديپلوماتيالىق مۇمكىندىكتەرىن بارىنشا كور­سەتىپ كەلەدى. استانادا يران يادرو­لىق ماسەلەسى بويىنشا جانە سيريا شيەلەنىسى ءجونىن­دە ناتيجەلى كەلىسسوزدەر جۇرگى­زىلدى. قازاقستاندا بۇۇ-مەن ىن­تىماقتاستىق اياسىندا ەكونوميكا, ەكولوگيا, الەۋمەت­تىك دامۋ سالاسىنداعى حالىق­ارالىق قۇقىقتىڭ ىلگەرى دامۋىنا, ادام قۇقىعىنىڭ ساقتا­لۋىنا, لاڭكەستىكپەن, ۇيىم­داستىرىلعان قىلمىسپەن جانە ەسىرتكى بيزنەسىمەن كۇرەس سالاسىنا ەرەكشە نازار اۋدارىلۋدا. ميرا بايبەك, «ەگەمەن قازاقستان» الماتى