بيزنەستىڭ 67%-ى ءوز قىزمەتكەرلەرىنىڭ بىلىمىنە قاراجات جۇمساۋعا ق ۇلىقسىز

قازاقستاندا 2433 كاسىپورىن دۋالدىك ءبىلىم بەرۋدى قولعا العان, وندا 80 ماماندىق پەن 160 سانات بويىنشا 27 مىڭ ستۋدەنت تاجىريبەدەن وتۋدە, دەپ جازادى palata.kz. «اتامەكەن» قر ۇلتتىق كاسىپكەرلەر پالاتاسىندا گەرمانيانىڭ ترير قالاسى قولونەر پالاتاسىمەن سەرىكتەستىك جوباسى اياسىندا «بيزنەس جانە ۇلتتىق بىلىكتىلىك جۇيەسى: ستراتەگيا جانە باعدارلامالار» اتتى فورۋم ۇيىمداستىرىلدى. فورۋمنىڭ ماقساتى – بىلىكتىلىك جۇيەسىندەگى, جۇمىس ورنىندا وقىتۋ مەن مامانداردى سەرتيفيكاتتاۋداعى بيزنەستىڭ مۇمكىندىكتەرى مەن تابىسىن جۇزەگە اسىرۋ بويىنشا ستراتەگيالىق مىندەتتەردى انىقتاۋ جانە وڭىرلىك باعدارلامالاردى جاساۋ. فورۋمعا سالالىق مينيسترلىكتەردىڭ, مەكەمەلەردىڭ, حالىقارالىق ۇيىمداردىڭ, جۇمىس بەرۋشىلەر بىرلەستىكتەرىنىڭ وكىلدەرى شاقىرىلدى. باسقوسۋدا «اتامەكەن» ۇكپ باسقارما توراعاسىنىڭ ورىنباسارى ەلدار جۇماعازيەۆ دۋالدىك ءبىلىم بەرۋدى دامىتۋ, كولەدجدەردى باسقارۋدى بيزنەسكە بەرۋ ماسەلەسى وزەكتى ەكەنىن ايتىپ, فورۋم اياسىندا وسى ماسەلەلەرگە قاتىستى جول كارتاسىن دايىنداۋدى ۇسىندى. «وتاندىق كومپانيالاردىڭ دۋالدىك ءبىلىم بەرۋگە قىزىعۋشىلىعىن ارتتىرۋ ماڭىزدى. تەحنيكالىق جانە كاسىپتىك ءبىلىم بەرۋدە عانا ەمەس, كوللەدجدەر مەن جوعارى وقۋ ورىندارىنىڭ جالپى ءبىلىم بەرۋدەگى جاۋاپتىلىعى تۋرالى ماسەلە كوتەرگەنبىز. زەينەتاقى اۋدارىمدارىنا قاراپ تۇلەكتەرگە سۇرانىس قانشالىقتى جوعارى ەكەنىن, وسىلايشا وقۋ ورىندارىنىڭ رەيتينگىن انىقتاۋ دا ۇسىنىلدى. الايدا, زەينەتاقى اۋدارىمدارى بويىنشا ءبىتىرىپ شىققان ماماننىڭ ءدال قاي سالادا جۇمىس ىستەپ جاتقانىنى ءبىلۋ مۇمكىن ەمەس. ءبىزدىڭ زەرتتەۋىمىزدىڭ ناتيجەسىندە ىسكەرلىك كليمات, ياعني بيزنەستىڭ 67% ءوز قىزمەتكەرلەرىنىڭ بىلىمىنە قاراجات جۇمساۋعا ق ۇلىقسىز ەكەنى انىقتالدى. بۇل ۇلكەن ماسەلە. مامانداردىڭ بىلىكتىلىگىن ارتتىرۋدا كومەكتەسىپ وتىرعان كومپانيالارعا جەڭىلدىك بەرۋ ماسەلەسىن ويلاستىرۋ قاجەت. ءتيىستى زاڭنامالارعا وزگەرىستەر ەنگىزىپ, بيزنەستىڭ مامان دايىنداۋعا جۇمسايتىن شىعىندارىن وتەۋ جولىن قاراستىرۋ كەرەك.», – دەيدى باسقارما توراعاسىنىڭ ورىنباسارى. ترير قولونەر پالاتاسى «اتامەكەن» قر ۇكپ بىرگە 2015 جىلدان باستاپ جۇمىس ورنىندا وقىتۋ بويىنشا سەرىكتەستىك جوبانى جۇزەگە اسىرىپ كەلەدى. ونىڭ ماقساتى – قازاقستان كاسىپورىندارى مەن كوللەدجدەرىندە شاعىن جانە ورتا كاسىپكەرلىك وتىنىمدەرى بويىنشا كاسىبي دايىنداۋ دەڭگەيىن تۇراقتى ارتتىرۋعا كومەكتەسۋ. جوبا 2014 جىلدان باستاپ جاسالدى جانە كاسىپورىنداردىڭ, وڭىرلىك كاسىپكەرلەر پالاتالارىنىڭ ءدۋالدى وقىتۋدى ۇيىمداستىرۋداعى ءرولىن كۇشەيتۋگە, وندىرىستىك وقىتۋدى ۇيىمداستىرۋدا ترير قولونەر پالاتاسىنىڭ ناقتى مەحانيزمدەرىن پايدالانۋعا باعىتتالعان. ترير قولونەر پالاتاسىنىڭ وكىلى, سەرىكتەستىك جوبانىڭ ۇيلەستىرۋشىسى البەرت وۆەر ءدۋالدى وقىتۋ كوللەدجدەردىڭ باعدارلاماسىنا قارسى بولماۋىن, ول قاتىسۋشىلاردىڭ ءاربىر تاراپىنا ىڭعايلى بولۋ كەرەكتىگىنە باسا نازار اۋداردى. «گەرمانيادا دا سىزدەر ويلاعانداي بارلىعى جاقسى ەمەس. كاسىپورىندار مەن كوللەدج اراسىنداعى بايلانىستا ماسەلەلەر بار. بىراق ءبىز كەلىسىمگە كەلەتىندەي مودەلدى تاپتىق. قازاقستاندا دا ءدۋالدى ءبىلىم بەرۋدى ەنگىزۋدىڭ ءساتتى جوبالارىن مىسالعا الۋعا بولادى. كوللەدج ستۋدەنتتەرى ءۇشىن قوسىمشا ءبىلىم بەرەتىن ورتالىق اشۋ ماسەلەسىن تالقىلاۋعا قارسى ەمەسپىز. ەگەر وسىنداي اۋقىمدى جوبا قولعا الىنسا, وقىتۋشىلارمەن قامتاماسىز ەتۋگە جانە ولاردىڭ بىلىكتىلىگىن كوتەرۋگە دايىنبىز», – دەيدى البەرت وۆەر. جيىندا ءسوز العان قر ءبىلىم جانە عىلىم مينيسترلىگى تەحنيكالىق جانە كاسىپتىك ءبىلىم دەپارتامەنتى ديرەكتورىنىڭ م.ا. ناسىمجان وسپانوۆا قازاقستانداعى دۋالدىك ءبىلىم بەرۋدەگى ساتاتيستيكالىق مالىمەتتەردى كەلتىردى. ونىڭ ايتۋىنشا, بۇگىندە قازاقستاندا 2433 كاسىپورىن دۋالدىك ءبىلىم بەرۋدى قولعا العان, وندا 80 ماماندىق پەن 160 سانات بويىنشا 27 مىڭ ستۋدەنت تاجىريبەدەن وتۋدە. ءدۋالدى ءبىلىم بەرۋ بويىنشا 27 مىڭ ادام وقىپ جاتىر, بۇل بارلىق وقىپ جاتقاندار سانىنىڭ 5,5% قۇرايدى. «اتامەكەن» ۇكپ ادامي كاپيتالدى دامىتۋ دەپارتامەنتىنىڭ ديرەكتورى ولجاس ورداباەۆ تەحنيكالىق جانە كاسىپتىك ءبىلىم بەرۋدە كوللەدجدەردى بيزنەسكە باسقارۋعا بەرۋدەن باس تارتپاۋ كەرەكتىگىن ايتىپ, بىرنەشە مىسالداردى كەلتىردى. «قر ءبىلىم جانە عىلىم مينيسترلىگى كوللەدجدەردى بيزنەستىڭ باسقارۋىنا بەرۋگە دايىن ەمەس. سەبەبى وقۋشىلار كوللەدجەرگە 9 سىنىپتان كەيىن بارادى, ول جەردە 10-11 سىنىپتارداعى وقۋ باعدارلاماسى دا قامتىلادى. دەگەنمەن, ەلىمىزدە كوللەدجدەردىڭ بيزنەس وكىلدەرىنە بەرىلىپ جاتىر. ايتالىق, «بايسەركە-اگرو» اوك, «Alageum Electric» كەنتاۋ ترانسفورماتور زاۋىتى, «كازتسينك» كومپانياسىنا قاراستى كوللەدجەر جۇمىس ىستەيدى. بۇل مىسالدار ءبىلىم بەرۋ جۇيەسىنە زيان كەلتىرمەيدى دەپ ويلايمىز. بيزنەس سالاسى وزىنە مامان دايىنداۋ ارقىلى نارىققا بىلىكتى مامان شىعارادى», – دەيدى ولجاس ورداباەۆ. سونىمەن قاتار, ولجاس ورداباەۆتىڭ ايتۋىنشا گەرمانيانىڭ دۋالدىك ءبىلىم بەرۋ جۇيەسىن تۇتاستاي قازاقستانعا كوشىرۋ مۇمكىن ەمەس. سەبەبى, گەرمانيادا تەحنيكالىق-كاسىپتىك ماماندىقتى يگەرۋدە ازاماتتار الدىمەن وندىرىسكە بارادى. كاسىپورىن ماماندى وقىتۋ ءۇشىن سەرىكتەس ءبىلىم بەرۋ مەكەمەسىنە جىبەرەدى. وسىلايشا, جاستار ۋاقىتتىنىڭ 60% وندىرىستە, قالعان 40% ءبىلىم الۋعا جۇمسايدى. ال قازاقستاندا ءبىلىم الۋ ءۇشىن الدىمەن وقۋ ورىندارىنا بارادى, ودان كەيىن عانا تاجىريبە جيناۋ, جۇمىسقا ورنالاسۋ ماسەلەسى قاراستىرىلادى. سوندىقتان دا مامان ساپالى, بىلىكتى مامان دايىنداۋ ءۇشىن ءدۋالدى ءبىلىم بەرۋدى دامىتۋ كەرەك دەپ ەسەپتەيدى دەپارتامەنت باسشىسى.