2017 جىلدىڭ ءساۋىر ايىندا Apple كومپانياسىنىڭ قىزمەتكەرلەرىنە ارنالعان 70 گەكتار جەردى الىپ جاتقان جاڭا كامپۋس اشىلادى. بۇل تۋرالى كومپانيا ءوزىنىڭ رەسمي سايتىندا حابارلادى. "12 مىڭ قىزمەتكەردى جاڭا جەرگە كوشىرۋ ءۇشىن 1,5 جىل ۋاقىت كەرەك. ال عيماراتتار قۇرىلىسى جازدىڭ سوڭىنا دەيىن جالعاسا بەرمەك", دەلىنگەن حابارلامادا.
Apple Park دەپ اتالاتىن كامپۋس سانتا-كلارادا ورنالاسقان. جاڭا شتاب-پاتەردىڭ باس عيماراتى 26 گەكتار جەردى الىپ جاتىر. سونىمەن قاتار كامپۋستا مىڭ ورىندىق ستيۆ دجوبس اتىنداعى تەاتر اشىلادى.
- ستيۆ Apple Park بولاشاق ۇرپاق ءۇشىن يننوۆاتسيا ورتالىعىنا اينالعانىن قالادى. قىزمەت كەڭىستىگى مەن كولىك قوياتىن ورىن, بارلىعى دا قورشاعان ورتاعا زيان كەلتىرمەيتىندەي ەتىپ جاسالعان. ول ءبىزدىڭ كوماندانى جىگەرلەندىرەدى دەپ ويلايمىن. ءبىز الەمدەگى ەڭ تيىمدىلىگى جوعارى عيمارتتاردىڭ ءبىرىن سالدىق: كامپۋس تەك قايتا جاڭارتىلاتىن ەنەرگيا كوزدەرى ارقىلى جۇمىس ىستەيتىن بولادى, دەدى Apple كومپانياسىنىڭ باسشىسى تيم كۋك.
شتاب-پاتەر مەن تەاتردان باسقا كامپۋستا Apple Store دۇكەنى, ءدامحانا, ۇلكەن فيتنەس-ورتالىق, زەرتتەۋ جاساۋعا ارنالعان جابىق عيماراتتار بولادى. سونىمەن قاتار كولىك تۇراقتارىنىڭ ماڭىندا جەمىس-جيدەكتەر وتىرعىزىلىپ, قىزمەتكەرلەر ءۇشىن 3 كم-گە سوزىلعان جۇگىرۋ جولدارى سالىنادى.
