بۇل جالعاننان بەرەكە تاپپاعان تاعدىر

الەم جۇرتى ءانىن تىڭداپ, اللا بەرگەن تالانتىنا تامسانعان امىرەنىڭ عۇمىرى قۇپيا, جۇمباققا تولى بولدى. ءتىپتى بەرتىنگە دەيىن كۇمىس كومەي ءانشى ءومىرىنىڭ كولەڭكەلى تۇستارىنان كوپشىلىك قاۋىم بەيحابار-تۇعىن. مىنە, جازۋشى, دراماتۋرگ راحىمجان وتارباەۆ «امىرە» دراماسىندا ءپاني جالعاننان بەرەكە تاپپاي, كەڭ دۇنيەسى ءاپ-ساتتە كەم دۇنيەگە اينالعان ايگىلى ءانشىنىڭ تاعدىر-تالايىنا تەرەڭىرەك ۇڭىلەدى. كەشەگى جەكسەنبىدە ق.قۋا­نىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى «امىرە» دراماسىن قويىپ, ساحنا تورىندە حاس تالانتتىڭ ومىردەن كورگەن قي­ىندىقتارىن, قۇپيالارىن, ىشكى سىرىن, مۇڭىن اشىپ كورسەتە ءبىلدى. سپەكتاكلدىڭ ونە بويىندا ساعىنىش پەن قورقىنىش الما-كەزەك الىسىپ, ءبىر ساتتە ەلگە, جەرگە, وتباسىعا, ونەرگە, كەڭ دۇنيەگە دەگەن ساعىنىش جۇرەگىڭنىڭ ءنا­زىك قىلىن شەرتسە, ەندى ءبىر ساتتە قورقىنىش, ۇرەي, ازاپ, قا­تىگەزدىكتى كورىپ, جۇرەگىڭىز قان جىلايدى. تاعى ءبىر ايتارى, بۇل قويىلىمنىڭ مۋزىكالىق كوركەمدەلۋى دە كورەرمەنگە وتە ەرەكشە اسەر ەتتى. امىرەنىڭ اۋەلەتىپ سالعان ءانىن توڭىرەگىندەگىلەر ءىلىپ اكەتىپ, حورمەن ايتۋى تەاتر اكتەرلەرىنىڭ ونەرىن تاعى ءبىر قىرىنان تانىتقانداي. بۇل تۇستا حورمەيستر, قر ەڭبەك سىڭىرگەن قايراتكەرى امانتاي جۇماشەۆتىڭ ەڭبەگىن ايرىقشا اتاپ كەتۋ قاجەت. سپەكتاكلدىڭ قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ. امىرە بەينەسىن تەاتر ءارتىسى قاسىمحان بۇعىباي سومدادى. – بۇل پەسا بۇعان دەيىن بىرنەشە مارتە قويىلدى. وسى ۋاقىت ىشىندە كەم-كەتىگى تۇزەلىپ, تولىستى عوي دەپ ويلايمىن. جالپى, بۇل امىرەنىڭ العاشقى ساحنالىق بەينەسى بولعاندىقتان, رەجيسسەرگە دە كوپ اۋىرتپالىق ءتۇستى. سوندىقتان, رەجيسسەر نۇرلان جۇمانيازوۆتىڭ ەڭ­بەگى وتە زور. اكتەرلەردىڭ دە شەبەرلىگى كوڭىلىمنەن شىق­تى. راس, وتكەن عاسىردىڭ رەپرەس­سيا قاسىرەتتەرى تۋرالى تالاي رەت جازىلدى. ءار قالام­گەر سول زۇلماتتى وزىندىك ەرەك­­شەلىك­تەرمەن كورسەتكىسى كەلدى. مەن دە امىرە تۋرالى شى­عار­مامدا سولارعا ۇقساعىم كەلمەي, باسقا قىرىنان كەلدىم, – دەيدى بۇل جونىندە «امىرە» پە­ساسىنىڭ اۆتورى, بەلگىلى جازۋشى راحىمجان وتارباەۆ. ورالحان ءداۋىت, «ەگەمەن قازاقستان» استانا