جەكە تۇلعالاردىڭ قۇجاتتارى – انىقتامالىقتا

قازاقستان رەسپۋبليكاسى پرەزيدەنتىنىڭ ءارحيۆى ۇلتتىق ارحيۆ قورىنىڭ قۇجاتتارى ارقىلى قازاقستاندىق تاريحتى تانىمال ەتۋگە باعىتتالعان ءىس-شارالار شەڭبەرىندە جانە «بىرتەكتىلىك پەن بىرلىك» رەفورماسىنا ساي «100 ناقتى قادام» ۇلت جوسپارىنىڭ 87-قادامىن جۇزەگە اسىرۋعا ارنالعان «جەكە تەكتىك ارحيۆ قورلارى بويىنشا انىقتامالىق» كىتابىنىڭ تۇساۋكەسەرىن وتكىزدى. تاريح پەن تاعىلىمعا تولى انىقتامالىق كىتاپتىڭ لەنتاسىن اقيىق اقىن ءىلياس جانسۇگىروۆتىڭ بالاسى سايات جانسۇگىروۆ قيدى. انىقتامالىقتا سيرەك جانە بىرەگەي ارحيۆتىك قۇجاتتار كورىنىس تاپقان, قۇراستىرۋشىلار بەلگىلى ادامداردىڭ ءومىرى ارقىلى ەل تاريحىن ايقىنداۋدى مۇرات تۇتقان. جەكە تۇلعالاردىڭ ارحيۆتەرى ءوز كوزىمەن كورگەن, وزدەرى بەلسەنە قاتىسقان وقيعالاردى كەڭىنەن سيپاتتايدى. بۇل قۇجاتتار وتكەن ۋاقىتتىڭ وقيعالارىن, احۋالىن سەزىنۋگە, ەل تاريحىن تەرەڭ تانۋعا مۇمكىندىك بەرەدى. جەكە تەكتىك قۇجاتتاردىڭ قاي-قايسىسى دا قۇندى, سول سەبەپتى ول زەرتتەۋشىلەر قىزىعۋشىلىعىن تۋعىزارى ءسوزسىز. قازاقستان رەسپۋبليكاسى پرەزيدەنتىنىڭ ءارحيۆى قازاقستاننىڭ بەلگىلى مەملەكەت جانە قوعام قاي­رات­كەرلەرىنىڭ جەكە ارحيۆتەرىن قابىلداۋدى 1998 جى­لى باستاعان بولاتىن. قازىرگى كۇنى مەملەكەتتىك ساقتاۋدا 82 جەكە تەكتىك قور بار, ونىڭ ىشىندە قاسىم-جومارت توقاەۆتىڭ, ساعي جيەنباەۆتىڭ, وزبەكالى جانىبەكوۆتىڭ, مارات وسپانوۆتىڭ, ءانۋار ءالىمجانوۆتىڭ, ماناش قوزىباەۆتىڭ, ميحايل ەسەناليەۆتىڭ, اسانباي اسقاروۆتىڭ, باسقا دا كورنەكتى مەملەكەت جانە قوعام قايراتكەرلەرىنىڭ قورلارى جيناقتالعان. انىقتامالىق قازاقستان تاريحىنا قىزىعاتىن, ومىرباياندىق زەرتتەۋلەرمەن اينالىساتىن وقىرمان قاۋىمىنا ارنالعان. انىقتامالىقتىڭ تۇساۋكەسەرىمەن بىرگە تاريحي-قۇجاتتىق كورمە دە ۇيىمداستىرىلىپ, وندا جەكە قورلار مەن توپتامالاردان الىنعان قولجازبالار, كۇندەلىكتەر, عىلىمي جانە شىعارماشىلىق ەڭبەكتەر, فوتوسۋرەتتەر كورسەتىلدى. تۇساۋكەسەرگە قادىرلى قوناق رەتىندە انىقتامالىقتا جەكە قورلارى تۋرالى باياندالعان بەلگىلى قوعام قايراتكەرلەرى مەن ولاردىڭ تۋىستارى قاتىستى. ايگۇل احانبايقىزى, «ەگەمەن قازاقستان» الماتى