قىزىلوردا وبلىسىندا كاسىپكەرلىكتى دامىتۋ ماسەلەلەرى تالقىلاندى

قىزىلوردا وبلىسىنىڭ كاسىپكەرلەر كەڭەسىندە ايماقتا كاسىپكەرلىكتى دامىتۋ جانە اكىمشىلىك كەدەرگىلەردى جويۋ ماسەلەلەرى تالقىلاندى. - شاعىن جانە ورتا كاسىپكەرلىكتى, اسىرەسە ميكروكاسىپكەرلىكتى دامىتۋعا باسىمدىق تانىتۋ كەرەك. وبلىستا وڭىرلىك كاسىپكەرلىك پالاتاسى قۇرىلعاننان باستاپ (2013 جىلى) ايماقتاعى كاسىپكەرلىكتىڭ دامۋىنا ماقساتتى جۇمىستار جۇرگىزىلدى. ناتيجەسىندە مىڭنان اسا جۇمىس ورنى قۇرىلدى,- دەدى وبلىس اكىمى قىرىمبەك كوشەرباەۆ كەڭەس وتىرىسىن اشا وتىرىپ. وبلىس اكىمىنىڭ ورىنباسارى ەۆگەني كيم وڭىردەگى بيزنەستى دامىتۋدىڭ پەرسپەكتيۆالىق باعىتتارى تۋرالى بايانداما جاسادى. ونىڭ ايتۋىنشا قىزىلوردا وبلىسىندا توقىما جانە اياق كيىم, سونداي-اق اۋىلشارۋاشىلىعى, ونەركاسىپ, ماشينا جاساۋ جانە قاعاز ءوندىرىسىن دامىتۋعا بولادى. الايدا وڭىردە كاسىپكەرلىكتى دامىتۋعا ءداستۇرلى بيزنەس سالالارىن ءجون كورەتىن كاسىپكەرلەر مەن ستارت-اپ جوبالارعا نەسيە بەرمەيتىن ەكىنشى دەڭگەيلى بانكتەر كەرى اسەرىن تيگىزىپ وتىر. - ناقتى مىسال كەلتىرەيىن. جۋىردا ءبىز جۇمىس ساپارىمەن وزبەكستانعا باردىق. وزبەك كاسىپكەرلەرى توقىمادان باستاپ كۇردەلى ماشينا جاساۋ ونەركاسىبى سالالارىندا وتە بەلسەندى. ءتىپتى بالالار جورگەكتەرىنە دەيىن وندىرەدى,- دەدى ە.كيم. قىزىلوردا وبلىسى كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ كاسىپكەرلەر جۇمىسىنداعى اكىمشىلىك كەدەرگىلەردى جويۋ بويىنشا اتقارعان جۇمىستار جونىندە باياندادى. «پالاتا كەڭەسشىلەرى جۇزدەگەن كاسىپكەرلەرگە ءوز قۇقىقتارىن قورعاۋعا كومەكتەستى» دەپ جەتكىزدى ع.جاقسىلىقوۆ. سونداي-اق كەزدەسۋ بارىسىندا وتكەن جىلدىڭ جەلتوقسان ايىنىڭ اياعىندا اشىلعان كاسىپكەرلەرگە كەڭەس بەرۋ ورتالىعىنىڭ تۇساۋكەسەرى ءوتتى. ورتالىقتىڭ باستى ماقساتى كاسىپكەرلەرگە قىسقا ۋاقىتتا رۇقسات قاعازدارىن الۋ, كەڭەس بەرۋ بولىپ تابىلادى. بۇدان بولەك, كاسىپكەرلەرگە كەڭەس بەرۋ ورتالىعى ينۆەستورلاردى تارتىپ, ينۆەستيتسيالىق جوبالاردى جۇزەگە اسىرادى. كەڭەس وتىرىسىندا ايتىلعان ۇسىنىستار الداعى ۋاقىتتا تولىقتاي تالقىلاناتىن بولادى.