بيۋدجەت قاراجاتىن ءتيىمدى جۇمساۋدى باقىلاۋ ارتادى

ەكونوميكا ءوسۋىنىڭ جاڭا مودەلى بىزگە بۇرىننان سۇيەۋ بولىپ كەلە جاتقان شيكىزات سالاسىنىڭ مۇناي-گاز وندىرۋىنەن ەمەس, جاڭا, جوعارى تەحنولوگيالى سالالاردى دامىتۋعا نەگىزدەلگەنى جاڭا جولداۋدىڭ ەڭ باستى ەرەكشەلىگى بولدى دەپ ايتار ەدىم. جولداۋ قازاقستاننىڭ ءۇشىنشى جاڭعىرۋى دەپ اتالعانى دا تەگىن ەمەس. العاشقى جاڭعىرۋدى ءبىز وتكەن عاسىردىڭ 90-جىلدارىنىڭ ورتاسىندا, ال ەكىنشى جاڭعىرۋدى 2000-جىلداردىڭ باسىندا وتكەردىك. پرەزيدەنتتىڭ ايتۋىنا قاراعاندا, ەكونوميكانىڭ ءۇشىنشى جاڭعىرۋى جاڭا سالالارعا كوشۋمەن ەرەكشەلەنەتىن بولادى. ءوسىمنىڭ جاڭا فاكتورلارى اشىلماقشى. وسى ورايدا, پرەزيدەنت ۇكىمەتكە «تسيفرلىق قازاقستان» جەكە باعدارلاماسىن ازىرلەۋدى تاپسىرعانىن اتاپ وتۋگە بولادى. «تسيفرلىق يندۋس­تريا­­نى دامىتۋ باسقا سالالارعا دا سەر­پىن بەرەدى. سوندىقتان ۇكىمەت ءىت سالاسىن دامىتۋ ماسەلەسىن ەرەكشە باقىلاۋدا ۇستاۋعا ءتيىس», دەدى پرەزيدەنت. ماعان ۇلتتىق بانك فۋنكتسيالارىنىڭ وزگەرۋى قاتتى اسەر ەتتى دەپ ايتار ەدىم. بۇرىن بۇل بانك نەگىزىنەن ينفلياتسيانى رەتتەۋگە عانا جاۋاپ بەرەتىن ەدى. ەندى ول اقشا-قاراجات ساياساتىن ءتيىمدى جۇرگىزۋ ارقىلى ەكونوميكاعا ينۆەستيتسيا تارتۋ ماسەلەسىمەن دە شۇعىلداناتىن بولادى. وسى باعىتتا پرەزيدەنت ۇلتتىق بانكتىڭ ەلىمىزدەگى جالپى بانك سەكتورىن قالپىنا كەلتىرۋ بويىنشا شارالار كەشەنىن دايىنداۋدى تاپسىردى. بانكتەردىڭ بالانسىن ءتيىمسىز نەسيە­لەردەن ارىلتۋ جۇمىسىن جەدەلدەتىپ, قاجەت بولعان جاعدايدا ولاردىڭ كاپيتالىن اكتسيونەرلەر تاراپىنان ارتتىرۋدى قامتاماسىز ەتۋ كەرەك, دەدى پرەزيدەنت. سونىمەن قاتار, بانكتەردىڭ احۋا­لىنا جەدەل باقىلاۋ ورناتۋ ءۇشىن ۇلتتىق بانككە بۇرىنعىدان كوبىرەك قۇقىق بەرىلەتىن بولدى. سونىمەن بىرگە, ەلباسى ۇكىمەتكە ۇلتتىق بانكپەن بىرلەسىپ وتاندىق قور نارىعىن جانداندىرۋعا باعىتتالعان شارالار قابىلداۋدى تاپسىردى. سايىپ كەلگەندە, ەندى ۇلتتىق بانك ۇكىمەتپەن بىرگە ەكونوميكانىڭ وسۋىنە دە جاۋاپتى بولادى. جولداۋدا سالىق-بيۋدجەت ساياساتىن جاڭا ەكونوميكالىق جاعدايعا بەيىمدەۋ ماسەلەسى دە ايتىلدى. مۇنى وتە دۇرىس دەپ سانايمىن. وسىعان دەيىن بيۋدجەت شىعىستارىنىڭ تيىمدىلىگىنە اسا كوپ ءمان بەرىلمەيتىن. ەندى وسى باعىت تا قاداعالاناتىن بولادى. پرەزيدەنت 2017 جىلعى مەملەكەتتىك دامۋ باعدارلامالارىن قاجەتتى رەسۋرستارمەن تولىقتاي قامتاماسىز ەتتىك. ەندى مينيسترلىكتەر مەن ۆەدومستۆولاردىڭ وسىناۋ قاراجاتتاردى يگەرۋىنىڭ تيىمدىلىگىن تەكسەرۋ قاجەت, دەپ ناقتى مىندەت قويدى. بۇل شەشۋىن كوپتەن كۇتكەن ماسەلە بولاتىن. تەك باقىلاۋ مەن دۇرىس تەكسەرىس بولعاندا عانا جاق­سى ناتيجەگە قول جەتكىزىلەتىنى بەلگىلى. ۆياچەسلاۆ دودونوۆ, قازاقستان ستراتەگيالىق زەرتتەۋلەر ينستيتۋتىنىڭ (قسزي) باس عىلىمي قىزمەتكەرى