كاسىپكەرلىكتى قولداۋ باستامالارى ماڭىزدى

«اق جول» پارتياسى مەملەكەت باسشىسىنىڭ جولداۋىن قولدايدى. كەشە ورتالىق كوممۋنيكاتسيالار قىزمەتىندە وتكەن بريفينگ بارىسىندا «اق جول» پارتياسىنىڭ توراعاسى, پارلامەنت ءماجىلىسىنىڭ دەپۋتاتى ازات پەرۋاشەۆ ەلباسى جولداۋىندا كورسەتىلگەن باستامالار پارتيانىڭ ماقساتتارىمەن ۇشتاساتىنىن اتاپ ءوتتى. «مەملەكەت باسشىسى جاقىندا عانا ساياسي رەفورمالار تۋرالى ۇندەۋىن جاريالاعاننان كەيىن, ونىڭ قازاقستان حالقىنا جولداۋىن ءبىز ۇلكەن ۇمىتپەن, ەرەكشە قىزىعۋشىلىقپەن كۇتتىك. ەندى, مىنە, ءۇمىتىمىز اقتالدى دەسەك بولادى. سەبەبى, «قازاقستاننىڭ ءۇشىنشى جاڭ­عىرۋى: جاھاندىق باسەكەگە قابىلەتتىلىك» اتتى جولداۋىندا پرەزيدەنت كوپتەگەن وزەكتى ماسەلەلەرگە ءوز كوزقاراسىن ءبىل­دىرىپ, ولارعا بايلانىستى تاپسىرمالار بەرىپ وتىر. «اق جول» دەموكراتيالىق پارتياسى بيزنەس پارتياسى رەتىندە, اسىرەسە, ەكونوميكا جونىندەگى ۇسى­نىس­تاردى تولىق قولدايدى جانە ولاردى ىسكە اسىرۋعا ءوز ۇلەسىن قوسۋعا دايىن, – دەپ مالىمدەدى ا.پەرۋاشەۆ. – ءبىرىن­شىدەن, «اق جول» دەموكراتيالىق پارتياسى ەلباسىنىڭ جولداۋدا ايتقان بارلىق تاپسىرمالارىن قولدايدى, بيزنەس پارتياسى بولعاندىقتان, بىزگە, اسىرەسە, ونداعى ەكونوميكا جانە كاسىپ­كەرلىكتى قولداۋ سالاسىنداعى باستامالار اسا ماڭىزدى كورىنەدى». ول قازىرگى ۋاقىتتا قازاقستاننىڭ ءۇشىنشى جاڭعىرۋىن جانە ونىڭ با­سىم­دىقتارىن جۇزەگە اسىرۋ بويىن­شا بىرقاتار تاپسىرمالار جۇك­­تەلگە­نىن اتاپ ءوتتى. پارتيا توراعا­سىنىڭ اي­تۋىنشا, ءبىرىنشى باسىم­دىق – ەكونو­ميكانىڭ قارقىندى تەحنو­لو­گيا­لىق جاڭعىرۋى. ونىڭ شەڭبەرىندە تسيفر­لىق تەحنولوگيا­لاردى قولدانۋ ار­قىلى جاسالعان جاڭا يندۋستريالاردى تاراتۋ تاپسىرىلعان. «ۇكىمەتكە «تسيفرلىق قازاقستان» باعدارلاماسىن» ازىرلەۋگە تاپسىرما بەرىلدى. يننوۆاتسيالاردى قولداۋ مەن ولاردى وندىرىسكە جەدەل قوسۋ جاڭا ين­دۋستريانى قالىپتاستىرۋدا اسا ماڭىزدى فاكتور بولىپ تابىلادى», – دەپ ءتۇسىندىردى ا.پەرۋاشەۆ. ونىڭ اي­تۋىنشا, ەكىنشى كەشەندى تاپسىرما – جا­ڭا يندۋستريانى قالىپتاستىرۋمەن قاتار, قازاقستان ەكونوميكاسىنىڭ نە­گىز­گى ءداستۇرلى سالالارىن دامىتۋعا ىق­پال ەتۋ. «بۇل ورايدا, مەملەكەت باسشىسى ەڭبەك ونىمدىلىگىن ايتارلىقتاي ارتتىرۋدى تالاپ ەتىپ وتىر. ونىڭ نەگىزگى فاك­تورى اۆتوماتتاندىرۋ مەن زامان­اۋي تەح­نولوگيالاردى بارلىق جەرلەردە ەنگى­زۋ بولۋى ءتيىس. ۇكىمەتكە بيزنەس وكىل­دەرىمەن بىرلەسە وتىرىپ, 2025 جىلعا دەيىن ەكونوميكانىڭ نەگىزگى سالالارىن تەحنولوگيالىق قايتا جاراقتاندىرۋ مىندەتى تاپسىرىلدى», – دەدى دەپۋتات. سونداي-اق, ول «اق جول» پارتياسى بيزنەس ورتانى تۇبەگەيلى جاقسارتۋ مەن ونى كەڭەيتۋ تۋرالى باستامالاردى ەرەكشە ىقىلاسپەن قابىلداعانىن جەتكىزدى. «ءبىزدىڭ ستراتەگيالىق ماق­ساتتارىمىزدىڭ بىرىندە 2050 جىلعا قاراي ەلدىڭ جالپى ىشكى ونىمىنە بيزنەستىڭ قوساتىن جوسپارلى ۇلەسىن كەمىندە 50 پايىزعا جەتكىزۋ قاراستىرىلعان», – دەدى پارتيا توراعاسى. ايدار ورىسباەۆ, «ەگەمەن قازاقستان»