جاريالىلىق جەمقورلىقتىڭ جولىن كەسەدى

ەلورداداعى قازاق گۋمانيتارلىق زاڭ ۋنيۆەرسيتەتىندە «جەم­قورلىققا قارسى ءبىرىنشى مەديا ورتالىق» رەسپۋبليكالىق قوعامدىق بىرلەستىگىنىڭ ۇيىتقى بولۋىمەن «جەمقورلىققا قارسى قوعامدىق پىكىر, حالىقتىڭ ويىن قالىپتاستىرۋداعى قوعامدىق ۇيىمدار مەن باق-تىڭ ءرولى» تاقىرىبىندا فورۋم ءوتتى. جەمقورلىقپەن كۇرەستە قوعام مەن قوعامدىق ۇيىمداردىڭ, اقپارات قۇرالدارىنىڭ ءرولىن كۇشەيتۋ ارقىلى حالىقتىڭ ساناسىنا اسەر ەتۋدى ماقسات ەتكەن جيىنعا قۇقىق قورعاۋشىلار قاۋىمى, باق وكىلدەرى مەن ۇەۇ جەتەكشىلەرى  قاتىستى. سونداي-اق, فورۋم جۇمىسىنا مەملەكەتتىك قىزمەت سالاسىن­داعى وڭىرلىك حابتىڭ باسقارۋشى كومي­تەت توراعاسى ءاليحان باي­مەنوۆ تە قاتىسىپ, ءسوز سويلەدى. سىباي­لاس جەم­قورلىق – حالىقتى قاناۋ, كاسى­بي­لىكتى قۇنسىزدان­دىرۋ, ادال ەڭ­بەكتى قورلاۋ بولىپ تابى­­لا­تىندىعىن باسا ايتقان ول, تۇپتەن كەلگەندە, پارا بولىپ كەلە­تىن قارجىنىڭ بارلىعى قاراپايىم ەڭبەك ادامىنىڭ – شارۋا مەن جۇ­مىس­­­شىنىڭ, مۇعالىم مەن ءدارى­گەر­­­­­دىڭ اق ادال ماڭداي تەرى جەلى­نىپ, ۇر­لانۋىنان تۇسەتىندىگىنە توقتال­دى. «قازىر مەملەكەتتىك ورگاندار تاراپىنان شارالار قولدانىلۋدا. ءىرى لاۋازىم يەلەرىنە قاتىستى ىستەر قوزعالۋدا. بىراق جەمقورلىققا قارسى كۇرەستىڭ تيىمدىلىگىنە قاتىس­تى قوعامدىق پىكىردە ازىرگە سەڭ قوز­­ع­الا قويمادى. قوعامنىڭ مەم­لە­­كەتتىك ورگانداردىڭ تازالى­عى مەن ادالدىعىنا سەنىم دەڭگەيى ءالى دە بولسا تومەن. بۇل ءوز كەزەگىن­دە تۇراق­تى دامۋىمىز بەن مەم­لەكەت­تىگى­مىزگە قاتەر. جەمقورلىققا قار­سى تۇرۋ ورتاق ازاماتتىق پارى­زى­­­مىز بولۋى ءتيىس», – دەپ اتاپ ءوتتى ءا.بايمەنوۆ. القالى كەڭەستە سىبايلاس جەم­قورلىقپەن كۇرەس بيلىك قانا ەمەس, وعان بارلىق ازاماتتار اتسالىس­قاندا عانا ناتيجەلى بولاتىن­دىعى باياندالدى. سونىمەن قاتار, قوعامدىق اعارتۋ جۇمىستارى, ماسە­لەن, ادال مەملەكەتتىك قىزمەت­كەرلەر مەن پارا بەرمەيتىن كاسىپ­كەرلەر­دى دارىپتەيتىن اكتسيالار ۇيىمداستىرۋ, ولاردى بۇقارا­لىق اقپارات قۇرالدارى ارقىلى ناسيحات­تاۋ قاجەتتىگى دە ءسوز بولدى. اشىق پىكىر الماسۋ ءپىشىمىن­دە  وربىگەن جيىندا ءا.بايمەنوۆ مەملە­كەتتىك ينۆەستيتسيا, مەم­لەكەت­­تىك تاپسىرىسپەن قاتار, قوعام­­­دىق يگىلىكتەردى ءبولۋ, پاتەر كەزە­گىن نەمەسە جەر تەلىمدەرىن بەرۋ ءىسى ءالى دە اشىقتىق پەن جاريالى­لىق­تى قاجەت ەتەتىنىن العا تارتتى. ايتا كەتەيىك, مەملەكەتتىك قىز­مەت سالاسىنداعى وڭىرلىك حاب ءتيىستى مەملەكەتتىك ورگاندارمەن ءبىر­لەسە وتىرىپ, حالىقارالىق سا­راپ­­­شى­لاردىڭ قاتىسۋىمەن مەملە­كەت­­تىك ورگانداردىڭ ءباسپاسوز قىز­مەتشى­لەرى مەن جۋرناليستەر­دىڭ بىلىكتى­لىكتەرىن ارتتىراتىن سەمي­نار­لار ۇيىمداستىرۋدى كوز­دەپ وتىر. سونداي-اق, اقپان ايىندا گرۋزيادا وتەتىن حابتىڭ سەمي­نارىنا مەم­لەكەتتىك قىزمەتشى­لەرمەن قاتار, سىبايلاس جەمقورلىققا قارسى مەديا ورتالىق وكىلدەرى دە قاتىس­تىرىلادى دەپ جوسپارلانعان. نۇرلىبەك دوسىباي, «ەگەمەن قازاقستان»