جاستارعا ماحاببات مەيرامى كەرەك

وسى كۇنى جاستارىمىز وزگەنىڭ قاڭسىعىن تاڭسىق كورەتىن بولدى. ال ونداي مەرەكە وزىمىزدە بولسا نەسى بار. ءيا, ماحابباتقا دا ءبىر مە­رەكە كەرەك-اق. راس, «ەڭلىك-كە­بەك» كۇنى نەمەسە «قوزى مەن بايان» كۇنى بولسىن, جوق دەگەندە «عا­شىقتار كۇنىن» اتاپ وتەيىك دەپ ءارتۇرلى ويلار  ايتىلىپ-اق ءجۇر. ال ءبىزدىڭ ويىمىزشا, اتالمىش مەرەكەنى ماحاببات مەيرامى دەپ اتاعان ءارى ونى 15 ساۋىردە توي­لا­عان ءجون سياقتى. بۇل جۇمىر باس­ى­مىزعا تاپ بۇگىن عانا جۇمىرتقا سالعان يدەيا ەمەس. وسىدان ون­شاق­تى جىل بۇرىن وسى جازبا يەسىنىڭ قيالىنا قاۋىرسىن شانشىعان اتال­­مىش وي «حابار» اگەنتتىگىنىڭ اتى­نان مىڭداعان كو­رەر­مەننىڭ تال­­قىسىنا ۇسىنىلعان بولاتىن. كەيىنىرەك, 2003 جىلى «تاڭ قال­ما­ڭىز» جوباسىنىڭ نەگىزىندە ار­نايى باعدارلاما دا ءتۇسى­رىل­دى. ءان­شى-كومپوزيتور سەيفۋللين جول­با­رىسقا ارنايى ءان دە جاز­دىر­عان­بىز. سودان بەرى دە ماحاببات مەي­را­مىن ناسيحاتتاۋ جو­لىن­دا ار­نايى شارالار ۇيىمداس­تىر­ما­ساق تا, وسى كۇن قارساڭىندا ءتۇرلى باع­دارلامالاردا ماحاببات تاقى­رى­بىن­دا وي قوزعاپ, كورەر­مەن­گە مەرەكەلىك كۇڭىل-كۇي بەرۋگە تىرى­سىپ-اق ءجۇرمىز. وسى ارادا وقىرمان, كورەر­مەن قاۋىمنىڭ «...نەگە ناۋرىز, نە­گە مامىر ەمەس» بولماسا «...نەگە سول ءساۋىر ايىنىڭ 14-ءى نەمەسە 16-سى­نىڭ ءبىرىن بەلگىلەمەسكە» دەپ ساۋال تاستاۋى ابدەن مۇمكىن-اۋ. ءبىزدىڭ ويىمىزشا, ماحاببات مەرەكەسى ءسوزسىز كوكتەم مەزگىلىندە بولۋ كەرەك. كوكتەم – كۇللى ادامزات ءۇشىن سەزىمنىڭ, شۋاقتىڭ, شابىت­تىڭ, ياعني ماحابباتتىڭ ءسينونيمى سەكىلدى. ال ءساۋىردى تاڭداۋىمىزدىڭ ءبىر سەبەبى, بۇل ايدا عارىشكەرلەر كۇنىنەن باسقا بىردە-ءبىر ەلەۋلى مەرەكە جوق. ءساۋىردىڭ 15-جۇلدىزىن تاڭداۋى­م­ىز­دىڭ تاعى ءبىر سەبەبى, بۇل كۇن كوكتەمنىڭ بەل ورتاسى. سيم­ۆول­دىق جاعىنان كوڭىلگە قونىمدى. ءيا, ماحاببات مەيرامىن ايتۋ­لى داتاعا اينالدىرىپ, اۋقىمدى ءتۇر­دە اتاپ ءوتۋدىڭ ۋاقىتى جەتكەن سياق­تى. سەزىم مەرەكەسىنىڭ قاجەت­تى­گى سول – كەۋدەسىندە جۇل­قىنعان جۇدىرىقتاي جۇرەگى بار ادام ىشكى ءلۇپىلىن وزگەگە جەتكىزۋگە ىنتىق. ال كەز-كەلگەن ۇياتتى پەندە جان سىرىن جايىپ سالارعا ۇياڭ كەلەرى جانە راس. قىسقاسى, سەبەپ كەرەك. سال­دا­رىن ماڭدا­يى­نىڭ باعى بىلەر... سونىمەن ماحاببات اتتى تىل­سىم­­نىڭ جەتەگىندە قىل­شىل­دا­عان جىگىتتەر مەن ۋىلجىعان قىز­دار عانا جۇرگەن جوق. جەڭگەنىڭ اعاعا دەگەن ءتاتتى نازىن, جاردىڭ سۇيگە­نىنە دەگەن قۇشتارلىعىن, انانىڭ بالاعا دەگەن شەكسىز مەيىرىمىن, ءتىپ­تى اتا­نىڭ اجەگە دەگەن سىيلاس­تىعىن وسى ۇعىمنىڭ اياسى­نان تىس­قارى اكەتە المايسىز. سول كۇنى ىڭكار جۇرەكتەر جار­قىراي اقتارىلىپ جاتسا, ۇيدە داس­تارقان جايىلىپ, الاڭداردا كونتسەرتتەر, سارايلاردا كەشتەر, تەلەارنالاردا دۋماندار ءوتىپ جاتسا نەسى بار؟! سىيلىققا قازاقشا اشىق­حات­تار, قازاقى كادەسىيلار جولدا­نىپ جاتسا, شىركىن, ناعىز مەيرام سوندا بولار ما ەدى دەگەن قيالى­مىز, انىعىندا بالاداي ءما­پە­لەپ, بولاشاقتىڭ ءبىر كۇنىندە وڭ اسەرىنە كۋا بولساق دەگەن جوس­پارى­مىز بار. حوش, سونىمەن 15 ءساۋىر ماحاببات مەيرامى بولسىن. قولدايىق. جاقىنىمىزعا مەيىرىم سىيلايىق سول كۇنى. ەڭ باستىسى,   ءدال وسى كۇ­نى, ءاربىر ادام ءوز سۇيىكتىسىنە جۇرەك سىرى جازىلعان شاعىن اشىقحات نەمەسە جاۋقازىننىڭ ءبىر شوعىن سىي­لاسا, ءدال وسى كۇنى, ءاربىر ەر ازا­مات ءوز سۇيىكتىسىنىڭ قۇرمەتىنە كەم دەگەندە ءبىر كوشەت وتىرعىزسا; وسى كۇنى, جۇرتشىلىق وزدەرىنە ىڭ­عاي­لى ۋاقىتتا, ىڭعايلى جەردە (الاڭ­داردا, ستاديونداردا) بۋىن ءبيى «قارا جورعانى» بيلەپ, مەرەكەگە جالپىحالىقتىڭ سيپات بەرسە نۇر ۇستىنە نۇر بولار ەدى دەگەن ويدامىز. ايتپاقشى, ماحاببات مەي­رامى رەتىندە 15-ءشى ءساۋىردى تاڭ­داۋى­مىز­عا ازىرگە ءوزىمىز عانا بىلەتىن تاعى دا ءبىر سەبەپ بار. وسىنى تاپقان ال­عاش­قى ەكى ادامعا 77 مىڭ تەڭگەدەن ەكى سىياقىمىز بار. (بۇعان قاتىس­تى بولجامدارىڭىزدى a_sser@mail.ru  ەلەكتروندى پوچتاسىنا جىبەرۋگە بولادى). سەرىك اباس-شاح.