شىعىس قازاقستاندا التىن ءوندىرۋ ەكى ەسە ارتادى

قازاقستاندا التىن قورىنىڭ كولەمى بويىنشا ەكىنشى ورىندا تۇرعان «پوليمەتالل» كومپانياسى جىلدى قورىتىندىلاپ, 2017 جىلعا ارنالعان جوسپارلارىمەن, سونىڭ ىشىندە قازاقستانداعى ەكى جوبا – شىعىس قازاقستان وبلىسىنداعى «قىزىل» جانە قوستاناي وبلىسىنداعى ۆارۆارينسكي تۋرالى اقپاراتىمەن ءبولىستى, دەپ حابارلايدى قازاقپارات. كومپانيانىڭ ءباسپاسوز قىزمەتى جاريالاعان حابارلامادا «پوليمەتالل» توبىنىڭ باس اتقارۋشى ديرەكتورى ۆيتالي نەسيستىڭ پىكىرى كەلتىرىلگەن. ول كومپانيانىڭ ەركىن اقشا اعىنىنىڭ تۇراقتىلىعىن ساقتاپ جانە اكتسيونەرلەرگە كولەمدى ديۆيدەندتەر تولەي وتىرىپ, وڭ وندىرىستىك ناتيجەلەرگە قول جەتكىزەتىنىن اتاپ ءوتتى. «وسىمەن بەسىنشى جىل قاتارىنان وندىرىستىك جوسپاردى ورىنداپ كەلەمىز. 2017 جىلى ەركىن اقشا اعىنىن قۇرۋعا, ديۆيدەندتەر تولەۋگە, قىزىلداعى قۇرىلىس جۇمىستارىن جانە ۇزاق مەرزىمدى جوبالاردى اياقتاۋعا كوڭىل بولەمىز», – دەدى ۆ.نەسيس. بۇگىندە قىزىلداعى بوس جىنىستاردىڭ ەسكى قالدىقتارىن كوشىرۋ جۇمىستارى تولىعىمەن اياقتالعان. قازىرگى تاڭدا بۇرعىلاۋ جۇمىستارى جاسالۋدا. 2017 جىلى ءوندىرىس كولەمى ەكى ەسەگە ءوسۋى ءتيىس. جوبا جۇمىستارى كەستەگە ساي جۇرگىزىلۋدە. ينجەنەرلىك تالدامالار مەن جوبالاۋ جۇمىستارى 2017 جىلدىڭ I توقسانىندا اياقتالادى دەپ كۇتىلۋدە. وڭدەۋشى فابريكانىڭ عيماراتى تۇرعىزىلىپ, كوپىرلى كراندار قوندىرىلعان. وڭدەۋشى قۇرىلعىنىڭ فۋندامەنتى ازىرلەنۋدە. كەن وندىرۋگە ارنالعان قۇرىلعىلاردىڭ العاشقى توپتاماسى (قويىلتقىش, كەپتىرگىش, ەلەكتەر) اكەلىندى. سىرتقى ينفراقۇرىلىم (جول, ەلەكتر جارىعى, سۋ) دايىن, قازىرگى تاڭدا الاڭنىڭ ينفراقۇرىلىمىن قۇرۋ جۇمىستارى جاسالۋدا. قىزىلداعى العاشقى كونتسەنتراتىن ءوندىرۋ جوسپار بويىنشا 2018 جىلدىڭ III توقسانىندا باستالادى.