ديماش قۇدايبەرگەن ۋنيۆەرسيادانىڭ اشىلۋىندا ونەر كورسەتەدى

قىتايدىڭ چاڭشا قالاسىندا ءوتىپ جاتقان ءان بايقاۋىنىڭ العاشقى ەكى كەزەڭىندە جەڭىسكە جەتكەن ديماش قۇدايبەرگەن الماتىعا كەلدى. ەل نامىسىن قورعاپ جۇرگەن ءانشىمىز بۇگىن ۋنيۆەرسيادانىڭ اشىلۋ سالتاناتىنا قاتىسىپ, تىكەلەي ەفيردە ونەر كورسەتەتىن بولادى. «ۋنيۆەرسياداعا قاتىساتىن بارلىق قاتىسۋشىلارعا ساتتىلىك, قازاقستانعا جەڭىس تىلەيمىن! مەن سىزدەرمەن بىرگەمىن!» – دەپ جازدى ينستاگرام پاراقشاسىندا. ال ءانشىنىڭ باسى-قاسىندا ءجۇرىپ, تىلماشتىق قىزمەت اتقارىپ جۇرگەن پروديۋسەر الپامىس شاريموۆ ينستاگرام پاراقشاسىندا: «ءبىز ۋنيۆەرسياداعا دايىنبىز. ساعىنىشپەن الماتىعا كەلدىك. سپورتشىلارىمىزعا ساتتىلىك تىلەيمىز! كوك بايراعىمىز كوكتە جەلبىرەسىن! ديماش بۇگىن تىكەلەي ەفيردە ونەر كورسەتەتىن بولادى. جاسا قازاق! العا, قازاقستان!» – دەپ جازدى. ايتا كەتەيىك, ديماش قۇدايبەرگەن قىتايدىڭ Hunan TV باستى ويىن-ساۋىق تەلەارناسىنداعى «I am a Singer-2017» مۋزىكالىق شوۋىنا قاتىسىپ ءجۇر. العاشقى كەزەڭدە «SOS d'un terrien en détresse» ءانىن شىرقاسا, كەشە ۆيتاستىڭ «وپەرا №2» ءانىن ورىنداپ, قوس كەزەڭدە دە ءبىرىنشى ورىن الدى. بۇل كونكۋرستا بارلىعى 14 كەزەڭ بار.