قوستانايدا گەورگي سوكوۆتىڭ كورمەسى ءوتتى

قوستانايلىق بەلگىلى سۋرەتشى گەورگي سوكوۆتىڭ كەزەكتى كورمەسى ونىڭ كورەرمەندەرىن تاڭعالدىردى. ل.تولستوي اتىن­داعى وبلىستىق امبەباپ كىتاپ­حانانىڭ كەڭ فويەسىندە اشىلعان كورمەگە كەلۋشىلەر سۋرەتشىنىڭ پلەنەرلىك جۇمىس­تارىن تاماشالادى. وقۋشى داپتەرىنىڭ ءبىر پاراعىنداي كولەمدەگى فورماتتارمەن ۇسىن­عان ەتيۋد جانرىنداعى پەيزاجدار كورەرمەن كوڭىلىنە جىلى شۋاق سەپكەندەي بولادى. تۋعان ولكەنىڭ كورىنىستەرى, تىرشىلىگى كوز الدىڭا كەلەدى. توبىل بويىنىڭ ۇزاق قىسىنىڭ قىتىمىر اۋاسىن, قىرمىزى كوكتەمدەگى گۇلدىڭ, اعاش بۇرشىگىنىڭ ءيىسىن, جايدارى جازدىڭ ىستىعىن, التىن كۇز لەبىن سەزىنگەندەي بولاسىڭ. – ءبىز كورمەنى دايىنداۋ بارىسىندا گەورگي مي­حايلوۆيچ بۇرىنعىسىنشا رامكاعا سالعان ۇلكەن سۋرەتتەر اكەلەدى عوي دەپ كۇت­كەنبىز. كىش­كەنتاي, ءبىر پا­راققا سال­عان سۋرەتتەردى كورگەندە نە ايتارىمىزدى بىلمە­دىك, ال سانى قىرىقتان اساتىن سۋرەت­تەر كەلۋشىلەردى سونشا­لىق­تى قىزىقتىردى, – دەيدى كىتاپ­­حانانىڭ ونەر ءبولى­مىنىڭ قىزمەتكەرى ءلاززات جاق­سىلىقوۆا. قوستاناي وڭىرىنە  تانىمال سۋرەتشى گەورگي سوكوۆتىڭ شى­عارماشىلىعىمەن تانىس ادام­عا ونىڭ قولتاڭباسى  بىردەن كوزگە ۇرادى.  نەگىزىنەن, كەس­كىندەمە, گرافيكا جانرىندا كوپتەگەن شىعارمالار جاز­عان قىلقالام شەبەرى  ءار جۇمى­سىنا تەرەڭ فيلوسوفيالىق تاقى­رىپتاردى ارقاۋ ەتەدى جانە پورترەتتەر سالاتىن. – مەن پەيزاج سالمايمىن, عۇمىرىمدا ول تاقىرىپقا سالعان سۋرەتىم ءۇش-تورتەۋ عانا دەسەم بولادى. ونى دا دوستاردىڭ وتىنىشىمەن سالعان ەدىم. ال بۇل جولعى پلەنەرلىك سۋرەتتەردى مەنىڭ «قويىن داپتەرىم» دەسەم بولادى. تۋعان ولكەنىڭ تابيعاتى دا, ادامدارى دا عاجاپ. مەن, مىسالى, قوستاناي كوشەسىندە كەتىپ بارا جاتىپ, ءوزىمنىڭ نازارىمدى قاتتى اۋدارعان كورىنىستەردى وتىرا قالىپ جازام دا, ول سۋرەت­تى ساقتاپ قويا بەرەمىن. ول مەنىڭ ەڭ كوپ دەگەندە 20 مينۋت عانا ۋاقىتىمدى الادى. بۇل سۋرەتتەردەن قوستانايلىقتار تۋعان جەر تىنىسىن بىردەن تانيدى دەپ بىلەمىن, – دەيدى گەورگي ميحايلوۆيچ. سۋرەتشىنىڭ كوپ جىلداردان بەرى سالىپ كەلە جاتسا دا, كوپشىلىك نازارىنا العاش ۇسىنىپ وتىرعان  پلەنەرلىك جۇمىستارىنىڭ   تاقىرىبى  ءار جىلداردى,   ۋاقىت وزگەرىستەرىن دە قامتيدى. استاسقان الۋان ءتۇرلى بوياۋ كورەرمەنىن ويعا جەتەلەيدى. ءنازيرا جارىمبەتوۆا, «ەگەمەن قازاقستان» قوستاناي