ەلدى ەلەڭ ەتكىزگەن ەلىك

قىسى قاھارلى شىعىستا مۇنداي جايتتارعا جەرگىلىكتى جۇرتتىڭ ەتى ۇيرەنگەن, كوپ تاڭعالا بەرمەيدى. دەسەك تە, «اۋىلعا ەلىك كىرىپ كەتتى» دەگەندە ەرىكسىز ەلەڭ ەتتىك. مۇنى بىزگە تارباعاتاي اۋدانىنىڭ اقسۋات اۋىلىن­دا تۇراتىن ارداگەر ارىپتەسىمىز حامزا ساتيەۆ حابارلادى.  – اڭشىلاردان قاشتى ما, يت-قۇستان ۇرىكتى مە ەكەن, باق­شامىزعا ەلىك كىرىپ كەتتى. قورشاۋداعى تەمىر تورعا سوعى­لىپ, جارالانىپ قالىپتى. ۇستاپ الىپ, جەكە قوراعا قاماپ, ءشوپ بەرىپ, ءۇش-ءتورت كۇن باقتىق. بەتىن­دەگى قانى كەتىپ, جاراسى جا­زىلعانداي بولعان كەزدە اۋىلدىڭ سىرتىنا تانا مىرزا اۋىلى جاقتاعى شابىندىققا اپارىپ, دالاعا بوساتىپ جىبەر­دىك, – دەيدى ارىپتەسىمىز. حامزا ساتيەۆتىڭ ايتۋىنشا, ەكى كوزى مولدىرەپ تۇرعان ءتۇز تاعىسى بالالاردىڭ قولىنان بوساپ شىعا سالىسىمەن زىمىراي جونەلىپتى. شامامەن ءجۇز مەتردەي جەرگە بارعاننان كەيىن توقتاپ, ارتىنا بۇرىلىپ, ءسال قاراپ تۇرىپتى دا, ەن دالانى بەتكە الىپ, قالىڭ شيگە بارىپ ءسىڭىپ كەتىپتى. «قورادا تۇر­عاندا ەلىكتىڭ قاسىنا بارىپ, ءشوپ سالىپ, باسىنان سيپاپ, سۋرەتكە ءتۇسىپ, باۋىر باسىپ قالعان نەمەرەلەرىم يمان­عالي مەن ايزەرە: «الگى ەلىك دالاعا قاشىپ بارا جاتىپ بىزگە بۇرىلىپ, «ساۋ بولىڭدار» دەدى عوي», دەپ ماقتانادى», دەپ اياقتاپتى حامزا ساتيەۆ اعامىز بىزگە جولداعان شاعىن حابارىن. ەلىك دەگەنىڭىز جانۋاردىڭ ىشىندەگى سۇلۋى عوي, شىركىن!  ارتىنا بۇرىلىپ قاراعانى, پەرىشتە كوڭىل بالالار مەن كەڭ پەيىلدى جۋرناليست-وتاعاسىنا جەتكىزگەن العىسى شىعار. وزىنەن گورى جۇرتتىڭ قامىن كوپ ويلايتىن جۋرناليست قاۋىمى شىنىندا دا اڭقىلداعان, العاۋسىز حالىق قوي. ءتۇز تاعىسى دا ءسىرا, سونى سەزگەن بولار. ازامات قاسىم, «ەگەمەن قازاقستان» شىعىس قازاقستان وبلىسى  سۋرەتتى تۇسىرگەن حامزا ساتيەۆ