كولىك پوليتسەيلەرى 57 مىڭ قۇقىق بۇزۋشىنى جاۋاپقا تارتتى

ىشكى ىستەر مينيسترلىگى كولىكتەگى ىشكى ىستەر دەپارتامەنتىنىڭ جەدەل كەڭەسى ءوتتى, دەپ حابارلايدى قازاقپارات. كەڭەس بارىسىندا ايتىلعانداي, 2016 جىلى دەپارتامەنتتىڭ قاراۋىنداعى ۋچاسكەدە 2642 قۇقىق بۇزۋشىلىق تىركەلىپ, ونىڭ 1796-سى قىلمىس جانە 846-سى تەرىس قىلىق ساناتتارىنا جاتقىزىلعان. كەشەندى شارالاردىڭ ناتيجەسىندە قىلمىستار سانى – 11,2 پايىزعا, ونىڭ ىشىندە اۋىر قىلمىستار 6,5 پايىزعا تومەندەگەن. سونىمەن قاتار, بۇزاقىلىق – 28,8 پايىزعا, قاراشىلىق – 22,7 پايىزعا, الاياقتىق – 20 پايىزعا, بوتەننىڭ مۇلكىن ۇرلاۋ 10,2 پايىزعا ازايدى. «قىلمىسكەرلەردى ىزدەستىرۋ بويىنشا ءتيىستى جۇمىستار اتقارىلدى. وتكەن جىلى اۋىر جانە اسا اۋىر قىلمىستاردى جاساعانى ءۇشىن ىشكى ىستەر ورگاندارىنان جاسىرىنىپ جۇرگەن 38 قىلمىسكەر ۇستالدى», دەلىنگەن دەپارتامەنتتىڭ مالىمەتىندە. بىلتىر كولىكتەگى ىشكى ىستەر دەپارتامەنتىنىڭ جەلىلىك بولىمشەلەرى ەسىرتكى زاتتارىنىڭ زاڭسىز اينالىمىنا بايلانىستى 453 فاكتىنى انىقتادى. كولىك پوليتسەيلەرى 1 توننادان استام ءتۇرلى ەسىرتكى زاتتاردى تاركىلەدى. ونىڭ ىشىندە 3 كەلىدەن استامى گەروين. وتكەن جىلى بۇزاقىلىق پەن مادەنيەتسىزدىككە قاتىستى تەرىس قىلىقتارى ءۇشىن اكىمشىلىك جاۋاپكەرشىلىككە 57 مىڭ قۇقىق بۇزۋشى تارتىلدى.