ەلباسى قابىلدادى

مەملەكەت باسشىسى نۇرسۇلتان نازارباەۆ ەكونوميكالىق جانە سىبايلاس جەمقور­لىقپەن كۇرەس اگەنتتىگىنىڭ توراعاسى قايرات قوجامجاروۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. ق.قوجامجاروۆ پرەزيدەنتكە قارجى پوليتسيا­سىنىڭ اعىمداعى قىزمەتى تۋرالى باياندادى. كەزدەسۋ بارىسىندا نۇرسۇلتان نازارباەۆ جەمقورلىقپەن كۇرەس – بۇل قارجى پوليتسياسىنىڭ نەگىزگى مىندەتى ەكەنىن اتاپ ءوتتى. وسى باعىتتاعى جۇمىستى ەداۋىر جانداندىرۋ قاجەت. مەملەكەت باسشىسى قازاقستاننىڭ مىندەتى جەمقورلىق دەڭگەيى اناعۇرلىم تومەن مەملەكەتتەر قاتارىنا ەنۋ ەكەنىن اتاپ ءوتتى. قارجى پوليتسياسى اگەنتتىگى شاعىن جانە ورتا بيزنەستىڭ ىسىنە ارالاسپاۋى ءتيىس. وسىعان بايلانىستى شاعىن جانە ورتا كاسىپكەرلىك سۋبەكتىلەرىنىڭ قۇقىعىن قورعاۋ جونىندەگى شارانى كۇشەيتۋ قاجەت. كەزدەسۋ بارىسىندا سونداي-اق نەگىزگى مىندەتى حالىق اراسىندا قۇقىقتىق ساۋاتتىلىقتى ارتتىرۋ, سونداي-اق ازاماتتاردىڭ قۇقىق قورعاۋ جانە وزگە مەملەكەتتىك ورگانداردىڭ قىزمەتىنە سەنىمىن نى­عاي­تۋ بولىپ تابىلاتىن, ۇكىمەت بەكىتكەن 2015 جىل­عا دەيىنگى سىبايلاس جەمقورلىققا قارسى كۇرەس ءجو­نىن­دەگى سالالىق باعدارلاما تۋرالى اڭگىمە قوزعالدى. مەملەكەت باسشىسى قارجى پوليتسياسى ورگانىنا سىبايلاس جەمقورلىققا قارسى كۇرەستى كۇشەيتۋدى, كولەڭكەلى ەكونوميكانى بەيتاراپتاندىرۋ جونىندە ودان ءارى شارالار قابىلداۋدى, سونداي-اق ەكونو­ميكا­لىق سالاداعى قىلمىس تۇرلەرىن ىرىقتاندىرۋ جانە ىزگىلەندىرۋ تۋرالى ۇسىنىس ەنگىزۋدى تاپسىردى.